Túrkistan oblysynda munaı ónimderin zańsyz tasymaldaýdyń 567 deregi anyqtaldy

TÚRKІSTAN. KAZINFORM - Óńirde zańsyz janar-jaǵarmaı tasymalyna tosqaýyl qoıý sharalary kúsheıtildi.

Túrkistan oblysynyń ákimdigi janynan qurylǵan arnaıy jumysshy top kóleńkeli naryqqa tosqaýyl qoıý maqsatynda júıeli túrde tekserý jumystaryn júrgizip keledi. Onyń quramyna kásipkerlik jáne ónerkásip basqarmasy, polıtsııa departamenti, memlekettik kirister departamenti, qarjy monıtorıngi agenttigi, kólik ınspektsııasy, tabıǵı monopolııalardy retteý komıteti jáne jergilikti atqarýshy organ ókilderi kirgen.

- Ótken jyl ishinde jumysshy top arqyly Túrkistan oblysynda janar-jaǵar maıdyń kóleńkeli jolmen shetel asyp ketpek bolǵan 32 faktisi anyqtaldy. Sonymen qatar 350 tonna dızel otyny tárkilenip, 25 mln teńgeden astam aıyppul óndirildi. Qazirgi tańda óńirde 380 janarmaı quıý beketi jáne 9 munaı bazasy zańdy negizde jumys istep tur. AI-92, AI-95 jáne dızel otyny erkin satylýda jáne óńirde munaı ónimderine tapshylyq tirkelgen joq, - dedi Túrkistan oblysy kásipkerlik jáne ónerkásip basqarmasy basshysynyń orynbasary Nurgúl Ábdirazaqova.

Spıkerdiń aıtýynsha Ózbekstan Respýblıkasymen shektesetin úsh aýdanda munaı ónimderin zańsyz áketýdiń 567 deregi anyqtalǵan. Sondaı-aq, 6008 lıtr benzın men 32 370 lıtr dızel otyny sotpen tárkilenip, 21 mln. teńgeden astam aıyppul salynǵan. Jalpy memleketke keltirilgen shyǵyndy óteý maqsatynda 46 mln teńgeden astam aıyppul óndirildi.

Aıta keteıik, budan buryn Túrkistan oblysynda 4 jyl buryn joǵalǵan qyz tabylǵanyn jazǵan bolatynbyz.