Túrkistan oblysynda muqtajdarǵa berilgen úıler nege bos tur

Áleýmettik jelide taraǵan beınejazbada sóılegen turǵyndardyń biri baspanalardyń basym bóligi uzaq ýaqyt boıy bos turǵanyn aıtyp, jaýapty tulǵalardan máseleni sheshýdi surady.

Turǵynnyń aıtýynsha, memlekettik turǵyn úı alǵandardyń keıbiri berilgen baspanalarǵa qonystanbaǵan. 

— Úılerdiń berilgenine eki jylǵa jýyq ýaqyt boldy. Biraq eshkim turmaıdy. Eger turǵyn úıge muqtajdyq bolmasa, memleketke qaıtarylsyn. Úılerdiń 70-80 paıyzy bos tur. Qanshama adam baspana kezeginde tur. Tekserý bolady degende ǵana keıbireýler keledi. Bul máseleni kópten beri kóterip kelemiz. Aýdan ákiminiń jaýapty orynbasarynyń aldyna da talaı ret bardyq. Máseleniń oń sheshiletinin aıtady, biraq ázirge nátıjesin kórip otyrǵan joqpyz, — deıdi turǵyn.

Turǵyn baspanalardyń kimderge berilgenin anyqtap, olardyń paıdalanylýyna tekserý júrgizý qajettigin alǵa tartty.

Jaǵdaıǵa qatysty Saryaǵash aýdanynyń ákimdigi Kazinform agenttigine túsinik berdi.

Ákimdik málimetinshe, Saryaǵash qalasyndaǵy «Samal» shaǵynaýdanynda ornalasqan 35 jer úıde barlyǵy 120 páter bar. Onyń ishinde 48-i — bir bólmeli, 54-i — eki bólmeli, 18-i — úsh bólmeli páter.

— 2025 jylǵy naýryzda turǵyn úı kezegine sáıkes 80 páter tabystaldy. Onyń 46-sy — kópbalaly otbasylarǵa, 18-i — jetim balalarǵa, 16-sy halyqtyń áleýmettik osal toptaryna berildi. Bıyl «Otbasy bank» AQ arqyly taǵy 32 páter bólindi. Onyń tórteýi jetim balalarǵa, 28-i halyqtyń áleýmettik osal toptaryna berildi. Qalǵan segiz páter boıynsha bank tizimderdi anyqtap, bólý jumystaryn júrgizip jatyr, — dep habarlady aýdan ákimdigi.

Vedomstvonyń habarlaýynsha, 2026 jylǵy 1 qyrkúıekte jumys toby qurylyp, turǵyn úılerdiń paıdalanylýyna turaqty monıtorıng júrgizilip keledi. Sondaı-aq ákimdik beınejazbada kórsetilgen eki páterdiń kimderge berilgenin túsindirdi.

— Beınejazbada kórsetilgen «Samal» shaǵynaýdanynyń 7-kóshesindegi № 4 úıdiń 4-páteri 2025 jylǵy naýryzda jaldaý shartymen Ekinshi dúnıejúzilik soǵys ardagerlerine teńestirilgen sanattaǵy jalǵyzbasty azamat Tursyn Mamenovke tabystalǵan. Al 7-kóshedegi № 6 úıdiń 1-páteri 2025 jylǵy naýryzda jaldaý shartymen kópbalaly otbasy sanatyndaǵy Shahnoza Matkarımovaǵa berilgen. Ol Shymkent qalasyndaǵy dámhanada jaldamaly jumysshy bolyp isteıdi. 2026 jylǵy 29 qyrkúıekte atalǵan mekenjaılar boıynsha monıtorıng júrgizilip, nátıjesinde tıisti akt jasaldy jáne turǵyndarǵa eskertý berildi. Qazirgi ýaqytta sotqa júginý jumystary júrgizilip jatyr, — delingen aýdan ákimdiginiń jaýabynda.

Buǵan deıin Túrkistan oblysynda 108 myńnan astam azamattyń turǵyn úı kezeginde turǵanyn jazǵan edik.