Túrkistan oblysynda múgedektigi bar adamdardyń sany artyp, 103 myńǵa jýyqtaǵan
TÚRKІSTAN. KAZINFORM – Búginde respýblıkada 700 myńnan asa múgedektigi bar azamat bolsa, sonyń 103 myńǵa jýyǵy Túrkistan oblysynyń úlesine tıesili. Bul – oblys halqynyń 4,6 paıyzy jáne eldegi múgedektigi bar adamdardyń 14%-y.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń málimetinshe, óńirde múgedektigi bar azamattardyń 86 944-i (85%) – eresekter, al 15 457-si (15%) – balalar. Onyń ishinde birinshi toptaǵy azamattar sany – 9 684 (10,6%), ekinshi topta – 36 558 (35,7%), úshinshi topta – 40 702 adam (39,8%).
Statıstıkaǵa sáıkes, óńirde múgedektigi bar azamattar sany artyp keledi. Atap aıtqanda, 2024 jylmen salystyrǵanda kórsetkish 2 076 adamǵa, al 2023 jylmen salystyrǵanda 2 375 adamǵa kóbeıgen.
Vedomstvo málimetinshe, Túrkistan oblysynda 102 901 múgedektigi bar adam tirkelgen. Onyń 64 384-i – eńbekke qabiletti jasta.
– «Eńbek naryǵyn damytýdyń 2024-2029 jyldarǵa arnalǵan tujyrymdamasy» aıasynda 2025 jyly 6 538 múgedektigi bar azamatty jumyspen qamtý josparlanǵan. Jyl qorytyndysymen 4 689 adamǵa tıisti jumyspen qamtý sharalary kórsetildi. Al bıyl 6 600 adamdy jumyspen qamtý mejesi belgilenip, jyl basynan beri 118 azamat qamtyldy, - delingen tıisti basqarmanyń usynǵan aqparatynda.
Sondaı-aq bıyl óńirde 65 994 múgedektigi bar adamdy áleýmettik ońaltý sharalarymen qamtý úshin respýblıkalyq jáne oblystyq bıýdjetterden 13,5 mlrd teńge bólingen.
Budan bólek, erekshe qajettiligi bar adamdardy ońaltý baǵdarlamasy aıasynda kórsetiletin qyzmetterdi qarjylandyrýǵa 2026-2028 jyldarǵa jalpy 44,3 mlrd teńge qarastyrylǵan. Atalǵan qarajat bıyldan bastap aýdandyq jáne qalalyq jumyspen qamtý jáne áleýmettik baǵdarlamalar bólimderiniń balansyna beriledi.
Osyǵan baılanysty bólingen qarjynyń maqsatty ári tıimdi ıgerilýin qamtamasyz etý úshin tıisti monıtorıng júrgizý josparlanyp otyr.
Qazirgi tańda oblysta basqarmaǵa qarasty 12 mekeme múgedektigi bar azamattarǵa túrli qyzmetter kórsetedi.
Budan buryn Almatyda múgedektigi bar adamdar úshin 34 myń nysanǵa aýdıt júrgizilgenin jazǵan edik.