Túrkistan oblysynda mototsıkl qaǵyp kóz jumǵan qyzdyń isi nege qysqartyldy

TÚRKІSTAN. KAZINFORM — Túrkistan oblysy Báıdibek aýdanynyń Borlysaı aýyl okrýginde 2025 jyldyń naýryz aıynda mekteptiń 1-synyp oqýshysy jol apatynan qaza tapqan edi. 

Mototsıkldy tizgindegen dál sol mekteptiń 11-synyp oqýshysy. Oqıǵa mektep janynda, sabaq ýaqytynda bolǵan.

Túrkistan oblysy bilim basqarmasynyń málimetinshe, oqıǵa orny men mektep qyzmetine tekserý júrgizilip, bilim berý uıymynyń jaýapty qyzmetkerlerine tártiptik shara qoldanylǵan.

Qaıtys bolǵan oqýshynyń otbasyna qajetti psıhologııalyq jáne áleýmettik qoldaý kórsetilgen.

— Borlysaı jalpy orta mektebiniń bilim, tárbıe salasyn zerdeleý jumysynyń qorytyndysy boıynsha ózine tıisti fýnktsıonaldyq mindetterine salǵyrt qaraǵany úshin mektep dırektoryna sógis, dırektordyń tárbıe jónindegi orynbasaryna qatań sógis, dırektordyń oqý isi jónindegi orynbasaryna eskertý berildi. Áleýmettik pedagogke qatań sógis, synyp jetekshisine sógis túrindegi tártiptik shara qoldanyldy, — delingen oblystyq bilim basqarmasynyń bizge bergen jaýabynda.

Atalǵan oqıǵaǵa qatysty Túrkistan oblysy polıtsııa departamenti resmı túsinik berdi.

— Báıdibek aýdanynda kámeletke tolmaǵan jaıaý júrginshini mototsıkl júrgizýshisiniń qaǵyp ketý faktisi boıynsha sotqa deıingi tergeý júrgizildi. Tekserý barysynda mototsıkl júrgizýshisiniń jaıaý júrginshini qaǵyp ketpeýge tehnıkalyq múmkinshiligi bolmaǵany anyqtaldy. Sebebi oqıǵa orny — jaıaý júrginshiler ótkeli emes. Qazirgi ýaqytta QR QPK-niń 35-baby 1-bóliginiń 2-tarmaǵyna sáıkes, qylmys quramynyń bolmaýyna baılanysty sotqa deıingi tergeý toqtatyldy, — delingen oblystyq PD usynǵan resmı aqparatta.

Sonymen qatar kólik quralynyń ıesi Ákimshilik quqyq buzý týraly kodekstiń birneshe babymen jaýapkershilikke tartylǵan.

Budan buryn Túrkistanda 9-synyp oqýshysyn synyptasy uryp óltirgenin jazǵan edik.