Túrkistan oblysynda monopolısterge 149 mln teńge aıyppul salyndy
TÚRKІSTAN. KAZINFORM — Óńirde tabıǵı monopolııa sýbektileri men qoǵamdyq mańyzy bar naryq sýbektilerine qatysty 73 ákimshilik is qozǵaldy.
Jyl basynan beri Tabıǵı monopolııalardy retteý komıtetiniń Túrkistan oblysy boıynsha departamenti 8 sýbektini jospardan tys tekserdi. Nátıjesinde 3 sýbektiniń zańnama talaptaryn buzǵany anyqtalyp, ákimshilik is qozǵaldy.
Atap aıtqanda, «OtebayGaz Aimaq» JShS-ne qatysty tekserý barysynda taýarlyq gazdy bólshek saýdada ótkizý kezinde shekti baǵany departamentpen kelisilgenge deıin qoldanǵany anyqtaldy. Nátıjesinde kompanııanyń 54 mln teńgeden astam negizsiz kiris alǵany belgili boldy.
— Kompanııaǵa qatysty ákimshilik is qozǵalyp, materıaldar Saryaǵash aýdandyq ákimshilik quqyq buzýshylyqtar jónindegi sotyna joldandy. Sonymen qatar, tutynýshylardan negizsiz alynǵan 54 143 642,18 teńgeni qaıtarý týraly nusqama berildi. Kompanııa nusqamaǵa shaǵym túsirgenimen, sot talapty qanaǵattandyrmaǵan. Qazirgi ýaqytta kásiporyn apellıatsııalyq shaǵym bergen, — dedi Tabıǵı monopolııalardy retteý komıtetiniń Túrkistan boıynsha departamenti basshysynyń orynbasary Nurbol Kókenov.
Budan bólek, «Kentaý Servıs» MKK-ǵa qatysty tekserý barysynda tutynýshyǵa bekitilgen tarıfti durys qoldanbaý faktisi anyqtaldy. Sot sheshimimen kásiporynǵa 2 mln 900 myń teńgeden astam ákimshilik aıyppul salyndy. Sondaı-aq tutynýshyǵa 43 myń teńgeden astam qaıta esepteý júrgizildi.
Al «Ońtústik Jaryq Tranzıt» JShS-ne qatysty tekserý barysynda satyp alý júıesin júrgizý talaptarynyń buzylǵany anyqtalyp, 3 mln 400 myń teńgeden astam ákimshilik aıyppul salyndy.
Jalpy, jyl basynan beri tabıǵı monopolııa sýbektileri men qoǵamdyq mańyzy bar naryq sýbektilerine qatysty 73 ákimshilik quqyq buzýshylyq týraly is qozǵaldy. Onyń 9-y sotta qaralyp, 9,86 mln teńge aıyppul salynǵan, taǵy 2 is qaralyp jatyr.
— Sonymen qatar departament qaraǵan 73 ákimshilik is boıynsha jalpy 149 357 322 teńge aıyppul salyndy. Búginde onyń 55 954 628 teńgesi memlekettik bıýdjetke óndirildi, — dedi Nurbol Kókenov.
Buǵan deıin kásipkerlerge kedergi keltirgen 30 monopolıst jaýapqa tartylǵanyn habarlaǵan edik.
