Túrkistan oblysynda mereke qarsańynda 3 medıtsınalyq nysan el ıgiligine berildi
TÚRKІSTAN. KAZINFORM- Búgin Saıram, Túlkibas jáne Ordabasy aýdanyna qarasty aýyldarda jańadan salynǵan úsh dárigerlik ambýlatorııa paıdalanýǵa berildi.
Bıyl Túrkistan oblysynda «Aýyldyq densaýlyq saqtaýdy jańǵyrtý» ulttyq jobasy aıasynda jalpy 49 medıtsınalyq-sanıtarııalyq alǵashqy kómek nysanyn salý josparlanǵan. Onyń ishinde 20 dárigerlik ambýlatorııa, 23 feldsherlik-akýsherlik pýnkt jáne 6 medıtsınalyq pýnkt salynýda.
Jalpy oblys boıynsha jyl sońyna deıin 48 medıtsınalyq nysan paıdalanýǵa beriledi. Bireýi jeke ınvestor esebinen salynady. Basym kópshiliginiń qurylysy aıaqtalǵan. Jańadan ashylatyn nysandar tıisti qural-jabdyqtarmen qamtylǵan. Aýyl turǵyndaryna sapaly alǵashqy medıtsınalyq-sanıtarııalyq kómek túrlerin kórsetedi. Al eski ǵımaratta bolǵan FAP-tardyń birqatary jańa nysanǵa aýystyrylady.
Saıram aýdanyndaǵy dárigerlik ambýlatorııanyń ashylý saltanatyna qatysqan Túrkistan oblysynyń ákimi Darhan Satybaldy turǵyndardy táýelsizdik kúnimen quttyqtady.
– Búgin oblysta bıyl salynǵan 49 dárigerlik ambýlatorııanyń alǵashqysynyń ashylý saltanatyna qatysyp otyrmyz. Óńirde ulttyq jobadan tys, oblys jáne ınvestorlar qarjysy esebinen 6 nysannyń qurylysy iske asyryldy. Osy nysandar arqyly aýyldar men eldi mekenderdiń 90 myńnan astam turǵyny medıtsınalyq kómekpen qamtylady, - dedi Darhan Satybaldy.
5 myńǵa jýyq turǵyny bar aýyldaǵy nysanda medıtsınalyq-sanıtarııalyq alǵashqy kómek kórsetiledi. Medıtsınalyq mekemede jalpy tájirıbeli dárigerlerdiń qabyldaý bólmeleri, áıelder bólmesi, kúndizgi em qabyldaý, emdik dene shynyqtyrý, ekpe egý, em-shara, súzgi bólmesi bar, sonymen qatar medıtsınalyq kómek kórsetý úshin barlyq qajetti qurylǵylarmen jabdyqtalǵan.
Osy kúni Túrkistan oblysy, Túlkibas aýdany, Abaıyl eldi mekeninde jańa medıtsınalyq tirek qurylysy aıaqtalyp, el ıgiligine berildi. Sonymen birge Ordabasy aýdany, Qarabastaý aýylynda zamanaýı úlgidegi feldsherlik-akýsherlik beket paıdalanýǵa berildi. Aýyl turǵyndary medıtsınalyq nysandardyń ashylǵanyna qýanyshtaryn jasyrmaı, el azamattaryna alǵystaryn bildirdi.