Túrkistan oblysynda memsatyp alýda 8,2 mlrd teńgege negizsiz 263 kelisimshart túzilgen

TÚRKІSTAN. KAZINFORM – Túrkistan oblysynda jyl basynan beri memlekettik satyp alý rásimderiniń aıaqtalǵan jalpy somasy 293,8 mlrd teńgeni quraǵan.

Taldaý jumystarynyń nátıjesinde, oblys kólemindegi memlekettik satyp alýdyń bir kózden satyp alý tásili arqyly jyl basynan zań talaptaryna sáıkes kelmeıtin jalpy somasy 8,2 mlrd teńgeni quraıtyn negizsiz túzilgen 263 kelisimshart anyqtalǵan.

Túrkistan oblysy máslıhatynyń málimetinshe, óńirde zań talaptary saqtalmaǵan 604 qurylys nysany belgili bolǵan.

Esepti kezeńde qurylys salasynda lıtsenzııa alýǵa, qaıta tirkeýge, attestat alýǵa qatysty barlyǵy 613 ótinish qabyldanyp, 291-i qanaǵattandyrylǵan, 219-y dáleldi bas tartylǵan. Onyń ishinde, lıtsenzııa alýǵa qatysty 151 ótinish tirkelip, 42 ótinish boıynsha dáleldi bas tartylsa, 109 ótinish qanaǵattandyrylǵan.

– Oblys boıynsha bıylǵy 10 aıda 1282 nysannyń qurylys-montajdaý jumystary bastalyp, baqylaýǵa alynǵan. Qurylysy aıaqtalyp, zań talaptaryna saı paıdalanýǵa qabyldanǵan nysandar sany – 958. Onyń 279-y bıýdjettik, 679-y jeke jáne ınvestıtsııalyq joba. Tıisti basqarma tarapynan óz betinshe salynǵan 30 zańsyz jeke kásipkerlik nysandardy májbúrlep buzdyrý týraly talap-aryzdar sotqa joldanyp, 5 nysandy buzýǵa sot sheshimi shyqqqan. 25 is sotta qaralyp jatyr, - delingen oblys máslıhaty taratqan resmı aqparatta.

Budan buryn Túrkistan oblysynda jerdi zańsyz paıdalanyp, paıdaly qazba óndirgender anyqtalǵanyn jazǵan edik.