Túrkistan oblysynda memlekettik bıýdjetke 1 trln teńge salyq túsken

Bul týraly baspasóz máslıhatynda Túrkistan oblysy boıynsha Memlekettik kirister departamentiniń basshy orynbasary Erlan Turysov málimdedi.

-2025 jyly 12 mlrd teńgege jýyq qosymsha kiris kózderi anyqtalyp, óndirildi. Atap aıtqanda kameralyq baqylaý nátıjesinde – 5,7 mlrd teńge, jer qoınaýyn paıdalanýshylardy ákimshilendirý baǵytynda – 3,5 mlrd teńge, kedendik ákimshilendirý nátıjesinde jáne QQS ákimshilendirý baǵytynda - 2,6 mlrd teńge. Budan bólek, óńirde kóleńkeli kásipterdiń aldyn-alý maqsatynda departament tarapynan turaqty reıdtik sharalar uıymdastyrylyp turady. Mysaly, 2025 jyly kedendik baqylaý nátıjesinde zańsyz esirtki zattaryn alyp ótýdiń 32 deregi anyqtaldy. Sondaı-aq, munaı ónimderin zańsyz áketýdiń 271 deregi anyqtalyp, sot arqyly 16,1 mln teńgeden astam somaǵa aıyppul salyndy. Jalpy 25,6 tonna benzın, 37,2 tonna dızel otyny tárkilendi. 

Sonymen qatar, 115 myń AQSh dollaryn elden zańsyz áketý boıynsha 5 derek boldy. Al, reıdtik tekserý nátıjesinde 640 salyqtyq quqyqbuzýshylyq anyqtaldy. Onyń ishinde, 375-si - baqylaý-kassa mashınasyn qoldanbaǵan, 143-i - salyq tóleýshi jeke kásipker retinde tirkelmeı kásipkerlik qyzmetpen aınalysqan, 7-i - salyq tóleýshi pos-termınal qoldanbaǵan, 115-i - salyq tóleýshi lıtsenzııasyz alkogol ónimderin satqandyǵy anyqtaldy.

Zańsyzdyqqa jol bergen kásipkerler quqyqtyq jaýapkershilikke tartylyp, aıyppul salyndy. Sondaı-aq, oblystaǵy 4 keden beketi arqyly kúnine orta eseppen 40 myń jeke tulǵa, 1 myńnan astam júk kólikteri, 1500 jeńil jáne 80 avtobýs ótedi. Sonymen qatar, departamenttiń baılanys ortalyǵyna 32,5 myńnan astam salyq tóleýshi júginip, máselelerin zańǵa sáıkes qarastyryp, jedel sheshý jumystary atqaryldy.

Aıta ketetin jaıt, turǵyndar «Salyq tóleýshiniń kabıneti», «Egov.kz» elektrondy úkimet portaly jáne «E-salyq Azamat», «E-salyq Business» mobıldi qosymshalary arqyly aqparat ala alady. Basqa máseleleri boıynsha keńes berýge arnalǵan «Telegram» áleýmettik jelisindegi «Salyq Bot» chaty táýlik boıy jumys isteıdi - dedi spıker.

Sondaı-aq, brıfıng barysynda Túrkistan oblysy boıynsha Memlekettik kirister departamentiniń Memlekettik kórsetiletin Qyzmetter basqarmasynyń basshysy Sáýle Shyrynbekova elimizdegi jańa salyq kodeksi týraly baıandama jasady.

-2026 jyldyń 1 qańtarynan bastap QR jańa Salyq kodeksi kúshine endi. Bul salyq júıesin reformalaýdaǵy mańyzdy kezeń. Jańa júıege sáıkes, birqatar júıeli ózgerister oryn aldy. Atap aıtqanda, saralanǵan salyq mólsheri engizildi, QQS reformalandy, «Sán-saltanat salyǵy» engizildi, arnaýly salyq rejımderi ózgerdi, salyq jeńildikterin alýdyń ashyq jáne naqty erejeleri ázirlendi.

Sondaı-aq, salyq eseptiliginiń nysandary 30%-ǵa qysqardy. Bıyldan bastap KTS - 20%, bank qyzmeti – 25%. oıyn bıznesi – 25%. áleýmettik salalar– 5%, aýyl sharýashylyǵy ónimin óndirýshiler - 3%. aýyl sharýashylyǵy kooperatıvteri – 6% kóleminde salyq tóleıdi. Al, QQS mólsherlemesi – 16%. Dári-dármek pen medıtsınalyq qyzmetterge – 5%. Mindetti tirkeý shegi – 10 000 AEK quraıdy. Spırttik ishimdikter men temekige aktsız jyl saıyn 10%-ǵa ósip otyrady. Sondaı-aq, sán-saltanat salyǵy boıynsha kólikter 18 000 AEK-ten bastap salyq qunynyń 10%, ıahtalar, ushaqtar 24 000 AEK-ten bastap salyq qunynyń 10% mólsherinde tólenedi. Baǵasy 450 mıllıon teńge asatyn jyljymaıtyn múlik salyǵy - 2 mıllıon 946 myń teńge.

Sonymen qatar, bıyl 3 arnaýly salyq rejımi arqyly salyq jınalady. Arnaýly salyq rejıminde QQS boıynsha aqparattyq júıe tóleý merziminde salyq somasyn avtomatty túrde kórsetedi. Salyq tóleýshi ony tek rastaıdy. Eger eseptilik ýaqytynda tapsyrylmasa, deklaratsııa nóldik dep qabyldanady. Aıyppul joq, biraq keıin qosymsha deklaratsııa arqyly túzetýge bolady. Josparly tekserýler joıyldy. Táýekelderdi basqarý júıesi endi buzýshylyqty anyqtaýǵa emes, aldyn alýǵa baǵyttalady. Shaǵyn jáne orta bıznes úshin tekserý merzimi men talaptarǵa shekteý qoıylady - dedi spıker.