Túrkistan oblysynda memleketke 32 mln teńge shyǵyn keltirgen jer qoınaýyn paıdalanýshylar ustaldy
Túrkistan oblysynda memleketke 32 mıllıon teńge shyǵyn keltirgen zańsyz jer qoınaýyn paıdalanýshylar ustaldy, dep habarlaıdy Kazinform.
Túrkistan oblysy polıtsııa departamentiniń uıymdasqan qylmysqa qarsy kúres basqarmasynyń qyzmetkerleri jedel-izdestirý is-sharalar keshenin ótkizdi. Nátıjesinde tártip saqshylary Jetisaı aýdanynyń aýmaǵynda zańsyz jer qoınaýyn paıdalanýmen aınalysqan Túrkistan oblysy men Shymkent qalasynyń 4 turǵynyn ustady. Olardan 1 júk tıegish jáne «Hovo» markaly 12 júk kóligi tárkilendi.
«Kúdiktilerdiń qumdy zańsyz óndirýge qatysy bar ekendigi dáleldendi. Jalpy memleketke kelgen shyǵyn shamamen 32 mıllıon teńgeni quraıdy. Qazirgi kezde QR QK-niń 334-baby 2-bóligi «jer qoınaýyn óz betinshe paıdalaný» boıynsha sotqa deıingi tergeý júrgizilýde. Saraptama taǵaıyndaldy» - delingen Túrkistan oblysy polıtsııa departamentiniń baspasóz qyzmeti taratqan aqparatta.
