Túrkistan oblysynda mekteptiń burynǵy dırektory sybaılas jemqorlyq úshin sottaldy
ASTANA. KAZINFORM — Túrkistan oblysynda mekteptiń burynǵy dırektory laýazymdyq ókilettikterin asyra paıdalanyp, muǵalimderge zańsyz biliktilik sanattaryn berip, para alǵany úshin sottaldy. Apellıatsııalyq qaıta qaraýdan keıin ol kináli dep tanylyp, 4 jyl 8 aıǵa bas bostandyǵynan aıyryldy. Bul týraly Bas prokýratýra málim etti.
Túrkistan oblysynda mekteptiń burynǵy dırektory memlekettik fýnktsııalardy oryndaýǵa ýákiletti adamǵa teńestirilgen adam bola otyryp, laýazymdyq ókilettikterin teris paıdalanyp, mindetti testileý jáne attestattaý komıssııasynan ótpegen muǵalimderge biliktilik sanattaryn zańsyz bergen, sondaı-aq muǵalimnen para alǵan.
— Sottalǵannyń áreketi 12 muǵalimge bıýdjetten jalpy somasy 16 mln teńgeden astam jalaqyny negizsiz tóleýge ákep soqqan. Birinshi sot qaraýy kezinde sottalǵan adam qylmystyq quqyq buzýshylyq jasaǵany dáleldenbegendikten, aqtalǵan, — dep habarlady quzyrly organnan.
Bas prokýratýranyń kassatsııalyq tártippen engizgen narazylyǵy boıynsha aqtaý úkiminiń kúshi joıyldy, is jańadan apellıatsııalyq qaraýǵa jiberildi.
— Іsti jańadan qaraý kezinde sot aıyptalýshyny laýazymdyq ókilettikterin teris paıdalanǵany jáne para alǵany úshin kináli dep tanydy. Memlekettik qyzmette laýazymdardy atqarý quqyǵynan ómir boıyna aıyra otyryp, oǵan 4 jyl 8 aı merzimge bas bostandyǵynan aıyrý túrinde jaza taǵaıyndaldy, — delingen habarlamada.
Aıta keteıik, buǵan deıin Almaty oblysynda 33 adamdy aldaǵan jer kadastry bóliminiń mamany sottaldy.
