Túrkistan oblysynda mektep muǵalimderi qatysqan janjaldyń vıdeosy tarady
TÚRKІSTAN. KAZINFORM — Saryaǵash aýdanyndaǵy Tólegen Tájibaev atyndaǵy № 67 mektepte muǵalimder men mektepke kelgen áıel arasynda bolǵan janjaldyń vıdeosy áleýmettik jelide jarııalandy.
Kadrlarda birneshe adamnyń bir-birimen sózge kelip, julqylasqany kórinedi. Beınejazbada mektep dırektorynyń qan qysymy kóterilgeni, sondaı-aq oqıǵa ornyna jedel járdem shaqyrylǵany jáne ýchaskelik polıtsııa qyzmetkerleriniń kelgeni aıtylǵan.
Oqıǵaǵa baılanysty Túrkistan oblysynyń bilim basqarmasy túsinikteme berdi.
Basqarmanyń málimetinshe, atalǵan jaǵdaı boıynsha Saryaǵash aýdandyq bilim bólimi tarapynan mektepte zerdeleý jumystary júrgizilgen.
— 2026 jylǵy 1 qyrkúıekte mektepke qoǵam belsendileri kelgeni anyqtaldy. Mektep qyzmetkerleri bilim berý uıymynyń aýmaǵyna kelgen tulǵalardyń kim ekenin jáne kelý maqsatyn anyqtaý úshin suraq qoıǵan. Osy jaǵdaı kezinde taraptar arasynda túsinispeýshilik týyndap, aýyzsha pikirtalas bolǵan. Onyń barysynda qyzmettik ádep talaptaryna sáıkes kelmeıtin sózder aıtylǵan, — delingen basqarma habarlamasynda.
Taraptar ishki ister organdaryna tıisti ótinishter joldaǵan. Qazir atalǵan jaıt boıynsha tekserý júrgizilip jatyr. Oǵan quqyqtyq baǵany quzyrly organdar beredi.
Bilim basqarmasynyń málimetinshe, qazirgi tańda mekteptegi ahýal turaqty. Oqıǵaǵa baılanysty mektep dırektory men pedagogterge qyzmettik ádep normalaryn saqtaý, qarym-qatynas mádenıetin ustaný jáne bilim berý úderisine qatysýshylarmen ózara syılastyq negizinde qarym-qatynas jasaý boıynsha túsindirý jumystary júrgizilgen.
Buǵan deıin atalǵan mektepte muǵalimderdiń aqsha jınaý men qysym kórsetýge qatysty dabyl qaqqanyn jazǵan edik.
