Túrkistan oblysynda muǵalim oqýshylardan oıýly jaketterin sheshýdi talap etken
TÚRKІSTAN. KAZINFORM — Qazirgi tańda jaǵdaıdy jan-jaqty zerdeleý úshin Túrkistan oblysynyń bilim basqarmasy men bilim sapasyn qamtamasyz etý departamenti ókilderinen turatyn arnaıy komıssııa quryldy.
Áleýmettik jelide ulttyq kıimmen sabaqqa barǵan oqýshylarǵa ursyp, oıýly jaketin kúshtep sheshtirgen ustazdyń vıdeosy tarady.
«Men sabaǵyma ózim jaýap beremin, aq kóılekpen otyrady» — degen muǵalim mektep dırektorynyń tárbıe isi jónindegi orynbasaryna da daýys kóteredi. Vıdeodaǵy kadrda jylap turǵan oqýshy qyz muǵalimniń sabaq ústinde psıhologııalyq qysym kórsetip, negizsiz jańa dápter arnatqanyn aıtady.
Atalǵan jaǵdaı 14-naýryz kúni Maqtaaral aýdanynda bolǵan. Túrkistan oblystyq bilim basqarmasy usynǵan aqparatqa súıensek, búginde bul máseleni QR Oqý-aǵartý mınıstrligi men jergilikti atqarýshy organdar óz baqylaýyna alǵan.
«Qazirgi tańda jaǵdaıdy jan-jaqty zerdeleý úshin Túrkistan oblysynyń bilim basqarmasy men bilim sapasyn qamtamasyz etý departamenti ókilderinen turatyn arnaıy komıssııa quryldy. Tekserý nátıjeleri boıynsha Qazaqstan Respýblıkasynyń qoldanystaǵy zańnamasy aıasynda tıisti sharalar qabyldanady. Mektep oqýshysyna pedagog-psıhologtardan qajetti psıhologııalyq qoldaý kórsetildi. Bul oqıǵa QR Oqý-aǵartý mınıstrligi men jergilikti atqarýshy organdardyń baqylaýynda» — delingen basqarma tarapynan usynylǵan aqparatta.
