Túrkistan oblysynda mektep qyzmetkerleri jóndeý jumystaryna tartylǵan
TÚRKІSTAN. KAZINFORM – Túrkistan oblysy Sozaq aýdany Kóktóbe aýylyndaǵy mektep ǵımaratynda áıelderdiń jóndeý jumystaryn júrgizip jatqan vıdeosy áleýmettik jelilerde keńinen tarady.
Beınejazba jeli qoldanýshylary arasynda qyzý talqylanyp, jóndeý jumystaryna áıelderdiń tartylý sebepteri týraly túrli pikirler aıtylǵan. Keıbir qoldanýshylar muny májbúrli eńbekpen baılanystyrǵan. https://www.instagram.com/reel/DZ4VljyMMHx/?igsh=NzlzZjB5bm14bG9r
Osy jaǵdaıǵa qatysty Túrkistan oblysynyń Bilim basqarmasy túsinik berdi.
Vedomstvo málimetinshe, vıdeoda kórsetilgen azamattar – mekteptiń tehnıkalyq qyzmetkerleri. Olar bilim berý uıymyn jańa oqý jylyna daıyndaý maqsatynda júrgizilip jatqan josparly jazǵy jumystarǵa ózderiniń laýazymdyq mindetteri aıasynda qatysyp jatyr.
– Mekteptiń tehnıkalyq qyzmetkerleri usaq jóndeý, retke keltirý, tazalyq saqtaý jáne abattandyrý jumystaryna qatysady. Qurylys jumystary tehnıkalyq qyzmetkerlerge júktelip, olar qosymsha nemese artyq eńbekke tartylyp jatqan joq. Qyzmetkerlerdiń eńbek mindetteri men jumys ýaqyty qoldanystaǵy talaptarǵa sáıkes uıymdastyrylǵan, – delingen basqarma taratqan aqparatta.
Sondaı-aq Bilim basqarmasy mektepte júrgizilip jatqan aǵymdaǵy áktep-syrlaý jumystaryna bıýdjetten qarjy qarastyrylmaǵanyn jáne bul jumystar boıynsha memlekettik satyp alý rásimderi ótkizilmegenin habarlady.
– Jazǵy kezeńdegi áktep-syrlaý jumystaryna qajetti syr-boıaý men emýlsııa satyp alýǵa ǵana qarjy bólindi, – dep málim etti vedomstvo.
Buǵan deıin Túrkistandaǵy kolledjde stýdent qyzdardy uldardyń bólmesin jınaýǵa májbúrledi degen aqparat taraǵan bolatyn. Atalǵan jaǵdaıǵa qatysty bilim basqarmasy túsinik bergen edi.
