Túrkistan oblysynda medıtsına uıymdary basshylaryn AQSh-ta oqytýǵa qatysty daý shyqty

ASTANA. KAZINFORM — Túrkistan oblysyndaǵy medıtsınalyq uıymdardyń basshylaryn AQSh-ta oqytýǵa arnalǵan 116,8 mln teńgelik kelisimsharttar áleýmettik jelide qyzý talqylandy. Osyǵan baılanysty oblystyq densaýlyq saqtaý basqarmasy tekserý júrgizý úshin tıisti qujattardy suratty.

Túrkistan oblysynda medıtsına uıymdary basshylaryn AQSh-ta oqytýǵa qatysty daý shyqty
Foto: pexels.com

Talqylaýǵa Facebook-tegi jazba sebep boldy. Onyń avtory Túrkistan oblysyndaǵy 16 medıtsınalyq uıymnyń AQSh-ta bir apta oqytý qyzmetin kórsetý úshin Skills Development Group jeke kásipkerligimen kelisimshart jasasqanyn málimdegen. Ár mekeme úshin oqý baǵdarlamasynyń quny 7,3 mln teńge bolǵan. Jarııalanǵan málimetke qaraǵanda, kelisimsharttardyń jalpy somasy 116,8 mln teńgege jetken.

Jazbada Skills Development Group jeke kásipkerligi 2026 jylǵy 14 qazanda Almatyda tirkelgeni aıtylǵan. Sol kúni memlekettik satyp alý portalynda óńirdegi emhanalardyń birimen jasalǵan alǵashqy kelisimshart jobasy jarııalanǵan.

Jazba avtory oqý baǵdarlamasynyń tolyq kórsetilmegenine nazar aýdarǵan. Onyń málimetinshe, kelisimshart qosymshalarynda Nıý-Iorkte 40 saǵat bilim alý jáne úsh juldyzdy qonaqúıge ornalastyrý qarastyrylǵan. Qyzmetter 2026 jylǵy 31 jeltoqsanǵa deıin kórsetilýge tıis.

Tapsyrys berýshiler qatarynda oblystyq klınıkalyq aýrýhana, aýdandyq jáne qalalyq aýrýhanalar, emhanalar, dıspanserler men basqa da medıtsınalyq mekemeler bar. Jazba avtory shetelde oqytý qunynyń negizdiligine jáne qyzmet kórsetýshini tańdaý tártibine de kúmán keltirgen.

Kazinform agenttiginiń resmı saýalyna jaýap bergen Túrkistan oblysynyń densaýlyq saqtaý basqarmasy óńirdegi medıtsınalyq uıym basshylarynyń AQSh-ta biligin arttyrýyna qatysty pikir bildirdi.

— Bul oqytýdy basqarma uıymdastyrǵan joq. Medıtsınalyq uıymdardyń basshylary oqý oryndaryn ózderi tańdap, óz qalaýy boıynsha tıisti oqý kelisimsharttaryn jasasqan, — dep habarlady oblystyq densaýlyq saqtaý basqarmasy.

Oblystyq basqarma josparlanǵan oqýǵa qatysty qujattardy zań talaptaryna sáıkestigin tekserý úshin suratqan.

— Basqarma Amerıka Qurama Shtattarynda josparlanǵan oqýǵa qatysty barlyq qujatty jan-jaqty zerdelep, qoldanystaǵy zańnama talaptaryna sáıkestigin tekserý úshin suratty, — delingen resmı jaýapta.

Vedomstvo zańbuzýshylyqtar anyqtalǵan jaǵdaıda tıisti sharalar qabyldanatynyn, tipti oqýdy toqtatý máselesi de qarastyrylýy múmkin ekenin atap ótti.

Eske salaıyq, buǵan deıin Túrkistan oblysynda 103 mln teńge sýbsıdııany jymqyrý isi sotqa joldanǵanyn habarlaǵan edik.