Túrkistan oblysynda aýrýhananyń qaraýyly dárigerdiń qaǵazdaryn tramadol alýǵa paıdalanǵan

TÚRKІSTAN. KAZINFORM – Polıtsııa qyzmetkerleri kúdiktiden 2400-den astam tramadol tabletkasyn tárkiledi.

Jedel-izdestirý is-sharalarynyń nátıjesinde Túrkistan oblysynyń polıtsııasy «tramadol» psıhotroptyq zatyn tasymaldaǵan kúdiktini ustady. Ordabasy aýdanynda «Toıota Kamrı» markaly avtokólikti toqtatqan tártip saqshylary salonnan 120 «tramadol» tabletkasy bar 4 polıetılen paketin tapty.

Sonymen qatar, kúdiktiniń turǵylyqty jerinen psıhotroptyq tabletkalary bar taǵy 1 paket tabyldy.

Alynǵan preparattyń jalpy sany 2416 «tramadol» tabletkasyn qurady. 

- Tergeý barysynda kúdiktiniń Arys aýdanyndaǵy medıtsına mekemeleriniń birinde qaraýyl bolyp jumys isteıtini anyqtaldy.Ol «dáriger beretin retseptiniń» taza blankilerin paıdalanyp, «tramadoldy» satyp alý úshin Shymkent qalasyna barǵan. Odan zattaı dáleldemeler tárkilendi. Qazirgi ýaqytta atalǵan fakt boıynsha sotqa deıingi tergeý júrgizilýde jáne barlyq mán-jaı anyqtalýda, - delingen Túrkistan oblysy polıtsııa departamentiniń baspasóz qyzmeti usynǵan aqparatta.

Aıta keteıik, budan buryn polıtsııa qyzmetkerine para bermek bolǵan aqtóbelik aıyppul tólegenin jazǵan bolatynbyz.