Túrkistan oblysynda máslıhat depýtattyǵyna 1152 kandıdat tirkeldi
TÚRKІSTAN. KAZINFORM — Túrkistan oblysynda máslıhat depýtattyǵyna kandıdattardy tirkeý qorytyndylary belgili boldy.
Túrkistan oblysyndaǵy 315 birmandattyq aýmaqtyq saılaý okrýgi boıynsha barlyǵy 1152 kandıdat tirkelgen.
— Onyń ishinde oblystyq máslıhattyń 23 saılaý okrýgi boıynsha — 81 kandıdat, qalalyq máslıhattardyń 44 saılaý okrýgi boıynsha — 176 kandıdat jáne aýdandyq máslıhattardyń 248 saılaý okrýgi boıynsha — 895 kandıdat tirkeldi, — dep habarlady Túrkistan oblystyq aýmaqtyq saılaý komıssııasy.
Osylaısha, birmandattyq aýmaqtyq saılaý okrýgterinde bir depýtattyq orynǵa orta eseppen úsh kandıdattan úmitker bolyp otyr.
Sonymen qatar oblystyq máslıhattaǵy 23 depýtattyq mandatqa tórt saıası partııa — «Ádilet», «Aq jol», «Aýyl» jáne Respublica partııalary jalpy sany 72 adamnan turatyn partııalyq tizimderin usyndy.
— Partııalyq tizimderdegi áıelder men jastardyń jıyntyq sany saqtalǵan. Tórt saıası partııanyń da partııalyq tizimderi tirkeýden ótti. Partııalardyń eshqaısysy usynylǵan tizimderin keri qaıtaryp alǵan joq, — delingen habarlamada.
Kandıdattardy tirkeý týraly málimetter kúntizbelik josparǵa sáıkes BAQ-ta jarııalanyp, tıisti ınternet-resýrstarda ornalastyryldy.
Buǵan deıin saılaý aldyndaǵy úgit 1 qarashada bastalǵanyn jazǵan edik.
