Túrkistan oblysynda «Mashkanaldy» mehanıkalyq tazalaý bastaldy

ASTANA. KAZINFORM – Dıqandardy qosymsha sýarmaly sýmen qamtamasyz etý úshin «Qazsýshar» RMK Túrkistan fılıaly «Mashınalyq ádispen sý kóterý kanalyn» mehanıkalyq tazartýdy bastady.

Sý resýrstary jáne ırrıgatsııa mınıstrligi málimetinshe, bul jumystarǵa jergilikti fılıaldyń tehnıkalary jumyldyrylyp, Syrdarııa ózeninen GNS-1 sorǵy stantsııasyna sý jetkizetin kanaldyń 2,6 shaqyrymy tazartylyp jatyr. Tazartý jumystary shildeniń 25-ine deıin tolyǵymen aıaqtalady dep kútilip otyr.

Nátıjesinde sorǵy stantsııasy qalypty jumys istep, «Dostyq» kanalyna qosymsha sekýndyna 10 tekshe metr sý jiberiledi. Sonymen qatar kanaldy tazartý «Dostyq» memleketaralyq kanalynyń tómengi bóligindegi sharýa qojalyqtaryn sýmen qamtamasyz etý sapasyn jaqsartyp, «Qazsýshardyń» Túrkistan fılıalyna qarasty kanaldaryndaǵy sý deńgeıiniń kóterilýine septigin tıgizedi.

- Júrgizilip jatqan jumystar kelesi jyly da «Mashkanaldyń» úzdiksiz jumys isteýine múmkindik beredi. Mehanıkalyq ádispen tazalaý jumystaryn jyldyń basqa mezgilderinde oryndaý múmkin emes, óıtkeni kanal aýmaǵyn tolyǵymen sý basady, - dedi «Qazsýshar» RMK Túrkistan fılıaly dırektorynyń orynbasary Serik Toıtanov.

Qazaqstannyń ońtústiginde sýarý kezeńi 20 kúnge erte bastalǵanyn eske sala keteıik.

Munyń sebebi - joǵary temperatýra men jaýyn-shashynnyń bolmaýy. Qazirgi ýaqytta Túrkistan oblysynda sýarmaly sý kanaldar arqyly kezekpen berilip jatyr.

Óńirde aýyl sharýashylyǵy qajettiligi úshin sý alý kólemi - 2,82 mlrd tekshe metr.

Aıta keteıik, Sátbaev atyndaǵy kanaldy jańǵyrtýǵa 12 mlrd teńge bólindi.