Túrkistan oblysynda marokko shegirtkesine qarsy óńdeý jumystaryna 65 top jumyldyrylady
TÚRKІSTAN. KAZINFORM - Arys, Saryaǵash, Keles aýdandarynda 3 myńnan astam azamattyń ıeligindegi jer qaýipti aımaqqa engen.
Ótken jyly túrkistandaqtyr shegirtke men shirkeıden kóp zardap shekti. Shegirtkeler sharýashylyqqa qaýip tóndirse, shirkeılerden adamdar zııan shekti. Bul baǵytta naqty algorıtmge sáıkes, uıymdasqan, ǵylymı tujyrymǵa súıene otyryp júıeli ári jedel áreket jasaý qajettiligi talqylanyp, negizgi sharalar bekitilip otyr.
Túrkistan oblysy ákiminiń orynbasary Nurbol Turashbekov zııankesterge qarsy hımııalyq óńdeý jumystaryna daıyndyqty pysyqtaý úshin jaýapty basqarma basshylarynyń, aýdan ákimderi orynbasarlarynyń qatysýymen Arys qalasynda kezekti ret jınalys ótkizdi.
Qazirgi tańda boljam ortalyǵy usynǵan kartaǵa súıensek, oblys kólemindegi dárilenetin aımaqtarda 65 top jumys isteıtin bolady. Ár topqa hımııalyq óńdeýge belgili bir aımaq bekitilip, nátıjeli jumys úshin olar barlyq qajettilikterimen qamtamasyz etiledi. Jumys shtabtary da belgilengen aımaqtarda ornalastyrylmaq. Dárilerdiń merziminde jetkizilýi, sýdyń qoljetimdiligi, dárileý quraldarymen tolyq jabdyqtaý isi turaqty baqylaýda bolady.
Búginde Arys, Saryaǵash, Keles aýdandarynda 3 myńnan astam azamattyń ıeligindegi jer qaýipti aımaqqa engen. Oblys kartasynyń keskininde tehnıkamen, ushaqpen jáne jaıaý júrip óńdeıtin aýmaqtar belgilenip otyr. Aýdan, qala ákimderiniń orynbasarlaryna óńirlerdegi daıyndyqty pysyqtap, týyndaýy múmkin ózekti máseleler men qajettilikterdiń tizimin tez arada usynýy tıis.
Túrkistan oblysy ákiminiń orynbasary Nurbol Turashbekov ákimdikterge jańa oshaqtardy anyqtaý men dárileý nátıjesin baqylaýǵa jer ıelerin qatystyrýdy tapsyrdy.
– Daıyndyq aqpan aıynyń ortasyna deıin aıaqtalýy tıis. Jumystyń bastalýy aýa-raıyna baılanysty ekenin túsinip otyrsyzdar. Jer qyzǵan kezde kúbirshelerden jándikter jerdiń betine shyǵady. Eki aptada qanattanyp úlgeredi. Osy eki aptada dárileýdi, qajet bolsa, aýysymmen toqtaýsyz júrgizýimiz qajet, – dedi Nurbol Turashbekov.
Aıta keteıik, budan buryn Túrkistanǵa qatynaıtyn áýe reısteriniń sany artatyndyǵyn jazǵan bolatynbyz.