Túrkistan oblysynda mal urlyǵyn kásip etken 4 qylmystyq top ustaldy

TÚRKІSTAN. KAZINFORM - Óńirde mal urlyǵy toqtamaı tur. 

Túrkistan oblysynda jyl basynan beri 13 derek mal urlyǵy qylmysy tirkelgen. Búginde onyń 10-y ashylyp, urlanǵan 71 bas maldyń 41-i ıelerine qaıtaryldy. Sondaı-aq oblys aýmaǵynda mal urlyǵyn jasady degen kúdikpen 14 adam ustaldy. Al, mal urlyǵyn kásip etken 4 qylmystyq toptyń joly kesildi. 

Máselen, Maqtaaral aýdanynda mal urlyǵyna qatysy bar kúdikti jas jigitter qolǵa tústi. Olar túngi ýaqytta jaıylymdyq jerde júrgen iri qara maldy júk kóligine artyp alyp ketken. Jábirlenýshige jarty mıllıon teńgege jýyq shyǵyn kelgen. Tártip saqshylary kúdiktiniń qorasynan qoldy bolǵan maldy tárkilep, ıesine qaıtardy. 

— Polıtsııa qyzmetkerleri mal jaıý erejelerin buzǵan 1 600-ge jýyq quqyq buzýshylyqty anyqtady. Veterınarııa qyzmetkerlerimen birlesip reıdtik is-sharalardy turaqty túrde júrgizip keledi. Atalǵan jumysshy toppen et ónimderi, aýyl sharýashylyq maldaryn qujatsyz, syrǵasyz tasymaldaýǵa tosqaýyl qoıylyp, 161 quqyq buzýshylyqtyń joly kesildi, - delingen Túrkistan oblysy polıtsııa departamentiniń baspasóz qyzmeti taratqan aqparatta. 

Aıta keteıik, budan buryn Shymkentte kortej jasaǵan mopedshiler jaýapqa tartylǵanyn jazǵan bolatynbyz.