Túrkistan oblysynda mal urlyǵymen aınalysqan toptyń áreketine tosqaýyl qoıyldy
AQTAÝ. KAZINFORM – Túrkistan oblysy polıtsııa departamentiniń krımınaldyq polıtsııa basqarmasy men Qazyǵurt aýdanynyń polıtsııa qyzmetkerleri birlesip, úı janýarlaryn urlaǵan topty ustady.
Polisia.kz-tiń málimetinshe, Qazyǵurt aýdandyq polıtsııa bólimine jergilikti turǵynnan aryz túsken. Ol belgisiz adamdar onyń 20-dan astam qoıy men sıyryn urlap ketkenin habarlaǵan. Keltirilgen materıaldyq shyǵyn shamamen 5 mıllıon teńgeni quraıdy.
Urlyq faktisin anyqtaý maqsatynda polıtsııa qyzmetkerleri jedel-izdestirý is-sharalaryn júrgizip, aıǵaqtardy zerttedi. Kóp uzamaı 20-35 jas aralyǵyndaǵy 5 kúdikti qolǵa tústi. Tintý kezinde kúdiktilerdiń biriniń úıinen 17 qoı men bir sıyr tabylyp, tárkilendi. Urlanǵan maldyń bir bóligi bazarda satylǵan, túsken qarajat kúdiktilerdiń qajettilikterine jumsalǵan.
Qazirgi ýaqytta kúdiktiler qamaýǵa alyndy. Sotqa deıingi tergeý jumystary júrgizilip jatyr.
Polıtsııa oqıǵanyń tolyq mán-jaıyn anyqtaý úshin qajetti sharalardy jalǵastyrady.
Osyǵan deıin habarlaǵanymyzdaı, Pavlodarda 40 mln teńge shyǵyn keltirgen bir top mal urysy ustaldy.
