Túrkistan oblysynda maqta terimi bastaldy
TÚRKІSTAN. KAZINFORM — Jetisaılyq sharýalar bıyl qytaılyq «60» degen maqta sortyn ekken bolatyn. Bir ereksheligi maqtanyń bul túriniń talshyǵy kóp, shıti az. Tipti qurt jemeıdi.
Jetisaı aýdanynda maqta terim naýqanyn alǵashqy bolyp bastaǵandardyń biri «Aıdar» sharýa qojalyǵynyń tóraǵasy Erbol Aıtýǵanov. Ol ıeligindegi 14 gektar jerge qytaılyq «60» sortynyń shıtin sepken. Bıyl sharýa gektarynan orta eseppen 50 tsentnerden ónim alýdy josparlap otyr. Sebebi, bul sorttyń buǵan deıingi maqta sorttaryna qaraǵanda talshyǵy kóp, shıti az. Agrotehnıkalyq sharalary durys júrgizilse mol ónim alý múmkindigi de joǵary.
«Aǵyn sýdan, mıneraldy tyńaıtqyshtardan bıyl qıyndyq kórmeýimizdiń nátıjesinde ónimdilik jaqsy. Aldyn biz „Sultan“, „Maqtaaral“, „Buqara“ degen sorttardy egetin edik. Ónim 20-25 tsentnerdi quraıtyn. Al, qalǵanyn qurt jeıtin. Bıyl Qytaıdyń „60“ degen sortyn ektik. Mol ónim alyp jatyrmyz», — deıdi Erbol Aıtýǵanov.
Bıylǵy jyly Jetisaı aýdanyndaǵy 79,3 myń gektar sýarmaly jerdiń 40,8 myń gektaryna maqta shıti egilgen. Qazirdiń ózinde óńirde 200 tonnaǵa jýyq maqta terildi. Naýqanǵa 715 traktor men 897 traktor tirkemeleri, 232 maqta terim mashınalary jumyldyrylyp otyp.
Ótken jyly 122 myń tonna aq ulpa jınaǵan jetisaılyq sharýalar bıylǵy jyly da sol mejeni oryndaýǵa nıetti. Óıtkeni, ónim sapasyn arttyryp, aǵyn sýdy únemdeýdiń tıimdi tehnologııasy sanalatyn tamshylatyp sýǵarý ádisi bıyldyń ózinde 2 myń gektarǵa artqan.
Onyń 300 gektardan astamy maqta daqylyn óndirýshilerdiń enshisinde.
