Túrkistan oblysynda Quryltaı saılaýynyń ashyqtyǵyn 32 qoǵamdyq birlestik baqylaıdy
TÚRKІSTAN. KAZINFORM – Túrkistan oblysynda Quryltaı saılaýyna daıyndyq aıasynda tórt jańa saılaý ýchaskesi ashylyp, alty ýchaskeniń shekarasy ózgertildi.
Búginde oblysta 2 mln 154 myń adam turady. Onyń ishinde 1 mln 203 myń 437 azamattyń daýys berý quqyǵy bar. Bul – óńir halqynyń 55,8 paıyzy.
Túrkistan oblystyq aýmaqtyq saılaý komıssııasynyń tóraǵasy Ańsar Óserbaevtyń aıtýynsha, óńirde 952 saılaý ýchaskesi jumys isteıdi, onyń 26-sy – jabyq ýchaske.
– Saılaýshylarǵa qolaıly jaǵdaı jasaý maqsatynda Túrkistan qalasy men Saýran aýdanynda №950-953 aralyǵyndaǵy tórt jańa saılaý ýchaskesi ashylyp, alty ýchaskeniń shekarasy qaıta aıqyndaldy. Óńirde saılaýshylar sany turaqty ósip keledi. Bıylǵy 1 qańtar men 1 shilde aralyǵynda daýys berý quqyǵyna ıe azamattar sany 8 253 adamǵa artty. Daýys berýshiler tizimi 2 tamyzda saılaý ýchaskelerine jetkizilip, 7 tamyzdan bastap azamattar óz derekterin teksere alady, – dedi Ańsar Jańabaıuly.
Onyń aıtýynsha, saılaý protsesiniń ashyqtyǵyn qamtamasyz etý úshin 32 qoǵamdyq birlestik akkredıttelgen. Bıyl saılaý komıssııalarynyń barlyq múshesin qamtyǵan 501 oqytý semınary ótkizildi. Quryltaı qarsańynda úsh deńgeıli júıe boıynsha 6 416 adamdy qamtıtyn oqytý jáne testileý jalǵasyp jatyr.
Sondaı-aq azamattarǵa aqparattyq qoldaý kórsetý úshin oblystyq «109» biryńǵaı Call-ortalyǵy men senim telefondary jumys isteıdi. Resmı saıtta «Óz saılaý ýchaskeńizdi tabyńyz» onlaın servısi qoljetimdi.
– Quryltaı kúni 557 saılaý ýchaskesinde azamattardyń tirkelgen mekenjaıyn «elektrondyq úkimet» portaly arqyly tekserý servısi iske qosylady. Budan bólek 22 saılaý ýchaskesinde ýaqytsha shaǵyn halyqqa qyzmet kórsetý ortalyqtary jumys istep, azamattardy bir kúnge ýaqytsha tirkeý qyzmetin kórsetedi, – dedi komıssııa tóraǵasy.
Sonymen qatar oblysta erekshe qajettiligi bar 14 873 saılaýshy tirkelgen. Onyń ishinde 3 365 azamat kreslo-arbany paıdalanady, 7 643 azamattyń kórý qabileti, al 3 865 azamattyń estý qabileti boıynsha múgedektigi bar.
Komıssııa tóraǵasynyń aıtýynsha, oblystaǵy 952 saılaý ýchaskesiniń barlyǵy arnaıy nysandar men qyzmetterdiń qoljetimdilik kartasyna engizilgen. Saılaý ýchaskeleri tirek-qımyl apparaty buzylǵan azamattarǵa arnalǵan jasyryn daýys berý kabınalarymen jáne arnaıy jabdyqtalǵan buryshtarmen qamtamasyz etilgen.
Buǵan deıin Quryltaı saılaýy 2026 jylǵy 23 tamyzda ótetini týraly jazǵan edik.
