Túrkistan oblysynda qurylysshy 4 metrlik shuńqyrǵa qulap ketti
TÚRKІSTAN. KAZINFORM – Túrkistan oblysynyń Túlkibas aýdanynda qurylysshy 4 metrlik shuńqyrǵa qulap ketti, dep habarlaıdy oblystyq tótenshe jaǵdaılar departamentiniń baspasóz qyzmeti.
Oqıǵa T.Rysqulov aýylyndaǵy bazar aýmaǵynda bolǵan. 1969 jyly týǵan er adam qurylys alańyndaǵy tereńdigi 4 metr bolatyn shuńqyrǵa abaısyzda qulap ketken. Ol ózdiginen shyǵa almaı qalǵan. Sodan tótenshe jaǵdaı mamandary shaqyrtyldy.
Oqıǵa ornyna dereý jetken qutqarýshylar zardap shekken adamdy shyǵaryp, jedel medıtsınalyq járdem qyzmetine tapsyrdy.
56 jastaǵy azamattyń qulaýyna qurylys jumystary kezinde qaýipsizdik talaptarynyń saqtalmaýy sebep bolýy múmkin.
Aıta keteıik, budan buryn Túrkistan oblysynda arnaıy shomylý oryndarynyń azdyǵy eń úlken máseleniń birine aınalǵanyn jazǵan bolatynbyz. Sondaı-aq, óńirde shomylý maısymy bastalmaı jatyp sý aıdyndarynda 21 qaıǵyly oqıǵa tirkeldi.