Túrkistan oblysynda qurylysyna 8,5 mlrd teńge jumsalǵan jańa mektep apatty jaǵdaıda tur
TÚRKІSTAN. KAZINFORM – Túrkistan oblysy Jetisaı aýdanynda «Keleshek mektepteri» jobasy aıasynda salynǵan mekteptiń qurylysyna 8,5 mlrd teńge jumsalǵan. Nysandy aıaqtaý merzimi bekitilgen kesteden keshigip otyr, qazirgi tańda onyń naqty qashan paıdalanýǵa beriletini belgisiz.
Jetisaı qalasyndaǵy 1 500 oryndyq mekteptiń qurylysy 2023 jyly bastalǵan. Jospar boıynsha bilim berý nysany 2024 jyldyń qyrkúıek aıynda paıdalanýǵa berilýi tıis bolǵan. Alaıda qurylys jumystary negizsiz sozbalańǵa salynǵan.
Búginde paıdalanýǵa berilmeı jatyp-aq mektep ǵımaratynyń qabyrǵalary jarylyp, shatyrynan sý aǵyp jatyr. Buǵan deıin nysanǵa birneshe ret zerdeleý júrgizilip, anyqtalǵan kemshilikterdi joıý tapsyrylǵanyna qaramastan, qurylys barysynda jiberilgen aqaýlar áli de jetkilikti. Merdigerdiń jaýapsyzdyǵy men oryndalǵan jumystardyń sapasyzdyǵynan qar men jańbyr sýy jertólege jınalyp jatyr. Sonymen qatar mektep ǵımaratynyń aınalasynda topyraqtyń shógýi baıqalyp, tóselgen plıtalar búlingen.
Atalǵan mektepte merdiger taraptyń ókilderimen kezdesken Jetisaı aýdanynyń ákimi Serik Mamytov nysannyń qabyldaýǵa múlde daıyn emes ekenin aıtty.
– Mekteptiń sapasy talapqa saı emes. Fasadtyń otyrýy baıqalady, abattandyrý boıynsha kemshilikter anyqtalyp jatyr. Qazirgi jaǵdaımen bul qurylys 2027 jylǵa deıin sozylýy múmkin. Biz nysandy áli qabyldaǵan joqpyz. Barlyq kemshilik tolyq joıylmaıynsha, nysan paıdalanýǵa berilmeıdi, - dedi ol.
Budan buryn Túrkistanda tańdaýly turǵyn úı kesheninde úıdiń edeni tómen túsip, irgesi ajyraǵanyn jazǵan edik.