Túrkistan oblysynda qurban shalý úshin arnaıy mal soıý oryndary belgilendi
TÚRKІSTAN. KAZINFORM – Túrkistan oblysynda Qurban aıt qarsańynda mal soıatyn arnaıy oryndar anyqtaldy. Al aıt namazy 27 mamyr kúni tańǵy saǵat 06:00-de óńirdegi 700-den astam meshitte oqylady.
Túrkistan oblysy din isteri basqarmasynyń bólim basshysy Súndet Júsipbektiń aıtýynsha, oblys aýmaǵynda 43 arnaıy mal soıý orny belgilengen.
– Onyń úsheýi – et óńdeý kásiporyndary. Ekeýi Saıram aýdanynda, bireýi Qazyǵurtta ornalasqan. Sondaı-aq aýdan, qalalarda 30 mal soıý beketi men 10 alań bar. Atalǵan oryndarda veterınarııalyq jáne sanıtarııalyq talaptarǵa sáıkes qurbandyq shalý rásimderi uıymdastyrylady, – dedi spıker.
Túrkistan qalasy aýmaǵynda alty oryn daıyndaldy. Onyń ekeýi shahardaǵy Túrkistan-Ahmet ıAsaýı jáne Názir Tórequlov atyndaǵy meshitterde ornalasqan. Qalǵan oryndar Shornaq, Shobanaq, 30 jyldyq jáne Orańǵaı aýyldarynda belgilengen.
Oblystyń bas ımamy Erjan Tólepov bıyl qurban shalýdyń ýaqyty 27 mamyrda aıt namazynan keıin bastalyp, 29 mamyr kúni ekinti namazyna deıin jalǵasatynyn aıtty.
– Qurbandyqtyń negizgi máni – muqtaj jandarǵa járdem berý. Sondyqtan qurban etin týystarǵa, kórshilerge jáne áleýmettik jaǵdaıy tómen otbasylarǵa taratý – saýapty is. Túrkistan oblystyq bas meshitinde 300-den astam muqtaj otbasynyń tizimi jasaqtalǵan. Al Túrkistan qalasy boıynsha 500-den astam az qamtylǵan otbasyǵa kómek kórsetý josparlanyp otyr, – dedi Erjan Tólepov.
Qurban aıt qarsańynda mal saýdasy jandana túsetinin aıtqan bas ımam kásipkerler men saýdagerlerdi baǵany negizsiz kótermeýge shaqyrdy.
– Taǵy bir atap óter mańyzdy jaıt, qurbandyq malyn tek et qunyn tólep, «bas-sıraǵy satýshyda qalady» degen shartpen shalýǵa bolmaıdy. Sharıǵat boıynsha qurbandyqqa shalynatyn mal tolyqtaı ıesiniń menshiginde bolýy tıis, – dedi spıker.
Al Túrkistan qalasynyń bas ımamy Ismaıl Panov oblys ortalyǵynda aıt kúnderi ulttyq dástúrdi nasıhattaýǵa erekshe kóńil bólinetinin jetkizdi.
– Din qyzmetkerleri aıt kúnderi ulttyq kıim kıedi. Ulttyq sport túrlerinen saıystar uıymdastyrylyp, qala turǵyndary men qonaqtaryna baýyrsaq pen dástúrli sýsyndar usynylady, – dedi qalanyń bas ımamy.
Budan buryn habarlaǵynymyzdaı, Bas múftı Qurban aıtqa daıyndyqta neni eskerý keregin aıtty.
