Túrkistan oblysynda kúnniń ystyǵynan bes ýchaskede joldyń beton jabyny kóterildi
TÚRKІSTAN. KAZINFORM – Túrkistan oblysynda birneshe kúnnen beri saqtalǵan aptap ystyq respýblıkalyq mańyzy bar joldardyń jaǵdaıyna áser etti. Joǵary temperatýra saldarynan óńirdegi birneshe baǵytta tsement-beton jabynynyń kóterilý faktileri tirkeldi.
Áleýmettik jelilerde kúnniń aptap ystyǵynan jol jabyny kóterilip, jarylǵany beınelengen vıdeolar tarady.
«Jol aktıvteri sapasynyń ulttyq ortalyǵy» RMK Túrkistan oblystyq fılıalynyń ınjeneri Nurjan Áshirmattyń aıtýynsha, 16-17 shilde kúnderi aýa temperatýrasynyń joǵarylaýyna baılanysty Shymkent-Taraz, Shymkent-Túrkistan jáne Tashkent-Shymkent baǵyttarynda tsement-beton jabynynyń isinip, kóterilýiniń 5 jaǵdaıy tirkelgen.
– Birneshe kúnnen beri óńirde kún kúrt ysyp, aýa temperatýrasy 40 gradýstan joǵary bolyp tur. Sonyń áserinen beton jabynynyń temperatýrasy 60-70 gradýsqa deıin kóterildi. Zaqymdanǵan ýchaskelerde jol qozǵalysy qaýipsizdigin qamtamasyz etý úshin ýaqytsha jol belgileri ornatyldy. Sonymen qatar «QazAvtoJol» mamandary men merdiger uıym «KAJ-Servıs» qyzmetkerleri qalpyna keltirý jumystaryn júrgizdi, – dedi ol.
Onyń aıtýynsha, sınoptıkter boljamyna sáıkes, óńirde aptap ystyq áli de saqtalady. Osyǵan baılanysty jol jabynynyń jarylý qaýpi tolyq seıilgen joq. Qazir barlyq ýchaskede turaqty monıtorıng júrgizilip, arnaıy brıgadalar jol jabynyna túsetin qysymdy azaıtý jáne joldyń tehnıkalyq jaı-kúıin baqylaý jumystaryn jalǵastyryp jatyr.
Buǵan deıin Túrkistan oblysynda aptap ystyqtan jol jabyny kóterilip ketkenin jazǵan edi.
