Túrkistan oblysynda qulaǵan úıden aýrýhanaǵa jetkizilgen áıel jansaqtaý bóliminde jatyr

ASTANA.KAZINFORM - Dárigerler úsh qabatty turǵyn úıdegi gaz jarylysynan jaraqat alǵan áıeldiń jaǵdaıy týraly aıtyp berdi.

Keshe keshke jedel járdem kóligi 1990 jyly týǵan áıeldi Otyrar aýdandyq ortalyq aýrýhanasynyń jedel járdem bólimine jetkizdi.

-Jaǵdaıynyń aýyrlyǵyna baılanysty naýqas shuǵyl túrde jansaqtaý bólimine jatqyzyldy. Sanıtarlyq avıatsııa arqyly Oblystyq klınıkalyq aýrýhana mamandary shaqyryldy. Qazirgi ýaqytta emdeý bekitilgen klınıkalyq hattamaǵa sáıkes júrgizilip jatyr, dep habarlady dárigerler.

Aıta keteıik, Túrkistan oblysynyń Otyrar aýdanyndaǵy Sháýildir aýylyndaǵy úsh qabatty, 12 páterli úıde gaz jarylysy boldy.

Aldyn ala málimet boıynsha, jarylys ekinshi qabattaǵy tabıǵı gazdyń shyǵýynan bolǵan. Jarylys saldarynan týyndaǵan soqqy tolqyny úsh páterdiń qabyrǵasyn qıratty.

Páter ıesi jaraqat alyp, aýdandyq aýrýhanaǵa jetkizildi.

Ǵımarat turǵyndary evakýatsııalandy. Keıbir otbasylar ýaqytsha Sháýildir aýylyndaǵy kolledj jataqhanasyna, keıbiri týystarynyń úıine ornalastyryldy.

Oblystyq ákimdik zaqymdanǵan ǵımaratty qalpyna keltirý jumystary aldaǵy kúnderi bastalatynyn habarlady.

Mamandandyrylǵan qyzmetterge apatty qalpyna keltirý jumystaryna kómektesý jáne jóndeý jumystary kezinde turǵyndarǵa ýaqytsha turǵyn úı berý tapsyryldy.

«QazaqGaz Aimaq» AQ aldyn ala málimetinshe, jarylys gazben jabdyqtaý júıesine ruqsatsyz qosylýdan bolýy múmkin.

Osyǵan deıin Túrkistan oblysyndaǵy kóppáterli turǵyn úılerdiń birinde gaz jarylysy bolǵany týraly jazdyq.