Túrkistan oblysynda quqyq buzýshylyqtyń aldyn alatyn tyń jobalar júzege asady
TÚRKІSTAN. KAZINFORM — Tártip saqshylary azamattardyń qaýipsizdigin qamtamasyz etý maqsatynda iske qosylǵan jańa jobalardy talqylady.
Túrkistan oblysynyń polıtsııa departamentinde ótken jıynǵa bas prokýrordyń orynbasary Ǵalymjan Qoıgeldıev, polıtsııa departamentiniń bastyǵy Murat Qabdenov, oblys prokýrory Murat Tileýberdıev, sondaı-aq jaqyn mańdaǵy Qyzylorda, Jambyl oblystary men Shymkent qalasynyń 54 konstıtýtsııalyq prokýrory jáne polıtsııa departamenti basshy quramy qatysty.
Іs-shara barysynda «Zań jáne tártip» qaǵıdaty aıasynda azamattardyń qaýipsizdigi qamtamasyz etý úshin «tsıfrlyq sheshimderdi» engizý máseleleri talqylandy.
Polıtsııa qyzmetinde kúndelikti zamanaýı tehnologııalardy qoldaný kún tártibinde turǵan máselelerdiń biri. Osy rette qatysýshylarǵa «kilemdi jabyn» jobasy, oqý oryndary men basqa da obektilerdiń beınebaqylaý kameralaryn jedel basqarý ortalyǵymen biriktirý, «SOS» dabyl túımeleriniń jumysy, «Tsıfrlyq polıtsııa» júıesi jáne quqyq tártibi men jol qaýipsizdigin nyǵaıtýǵa baǵyttalǵan «102» kóp arnaly mobıldi qosymshasynyń múmkindikteri kórsetildi.
Sondaı-aq birqatar polıtsııa bólimderiniń basshylary baıandama jasap, tergeý, krımınaldyq polıtsııa jumystarynda, sondaı-aq kadrlyq jumys pen materıaldyq-tehnıkalyq qamtamasyz etý salalarynda «Tsıfrlyq sheshimderdi» engizý nátıjelerimen tanystyrdy.
Aqparattyq tehnologııalardy paıdalaný, qoǵamdyq qaýipsizdikti qamtamasyz etý jáne qylmysqa qarsy kúres máselelerinde polıtsııa qyzmetiniń tıimdiligin arttyrýǵa múmkindik beretini atap ótildi.
Kezdesý sońynda qatysýshylar kórsetiletin qyzmetterdiń sapasyn jaqsartýǵa jáne oblysta qaýipsizdik deńgeıin arttyrýǵa baǵyttalǵan belgilengen maqsattardy iske asyrý boıynsha birlesip jumys isteýge daıyn ekendikterin jetkizdi.
Eske salsaq, jaqynda Túrkistan oblysynda 4 esirtki zerthanasy joıylǵany belgili boldy.
