Túrkistan oblysynda qýaty 50 MVt bolatyn kún elektr stantsııasy salyndy
Túrkistan oblysynyń Otyrar aýdanynda zamanaýı «Sháýildir» kún elektr stantsııasy ashyldy, dep habarlaıdy QazAqparat tilshisi.
Zamanaýı kún elektr stantsııasy Italııanyń «Plenitude» kompanııasynyń ınvestıtsııasy esebinen salyndy. Nysannyń saltanatty ashylýyna qatysqan Túrkistan oblysynyń ákimi Darhan Satybaldy ınvestorǵa, jobany júzege asyrýǵa úles qosqan azamattarǵa alǵysyn aıtty.
«Túrkistan oblysynyń jańartylatyn energııa kózderi salasynda úlken áleýeti bar. Oblys negizinen energııany syrttan ımporttaıdy jáne óz qýattary arqyly jalpy suranystyń 30%-yn ǵana qamtamasyz ete alady. Sondyqtan búgin ashylǵan stantsııanyń mańyzy óte zor. Qazirdiń ózinde oblysymyzda jalpy qýaty 362 MVt bolatyn 25 jańartylatyn energııa nysany bar. Ónerkásipti damytý úshin qýat kózderi jetkilikti bolýy qajet. Al jańartylatyn energııa salasyn órkendetý arqyly oblystyń ónerkásip salasy da damıtynyna senimdimiz. Bul bastama Italııa men Túrkistan oblysy arasyndaǵy baılanystardy nyǵaıtyp, jańa jobalarǵa jol ashady degen oıdamyn», – dedi Darhan Satybaldy.
Italııanyń Qazaqstan Respýblıkasyndaǵy elshisi Marko Albertı de mańyzdy jobaǵa toqtalyp, eki memleket arasynda iskerlik baılanys nyǵaıa beretinin jetkizdi. Sháýildirdegi kún elektr stantsııasyna sońǵy tehnologııalar qoldanylǵanyn atap ótti. Túrkistan oblysyndaǵy tarıhı sátpen quttyqtady. Al «Arm Wind» JShS-niń basqarýshy dırektory Aleks Stıllavato jańa kún elektr stantsııasy Túrkistan óńiriniń damýyna serpin beretinine, kómirteginiń aýaǵa taralýyn azaıtýǵa jáne aýa raıynyń jaqsarýyna úles qosatynyna toqtaldy. Jergilikti turǵyndar jumyspen qamtylatynyn aıtty.
«Sháýildir» kún elektr stansasynyń qurylysy – «Plenitude» kompanııasynyń Qazaqstandaǵy kún energetıkasy sektoryndaǵy alǵashqy mańyzdy qadamy.
Atalǵan jobany «TURKISTAN INVEST» JShS súıemeldedi. Qurylys kezinde jergilikti turǵyndardan 300-deı adam jumyspen qamtyldy. Qazir kún elektr stantsııasynda 50 jumys orny ashylǵan. Stantsııa 100 gektar aýmaqty alyp jatyr. 93 myńnan astam kún paneli men qosalqy elektr stantsııasy iske qosyldy. Bul toraptar uzyndyǵy 7,5 shaqyrym elektr tasymaldaý jelisi arqyly jergilikti jelige biriktiriledi.
