Túrkistan oblysynda qýaty 1 gıgavattyq bý-gaz qondyrǵylary salynady – Mınıstr
QR Energetıka mınıstri Almasadam Sátqalıev Qazaqstannyń ońtústik óńirlerinde energetıka salasynda iske asatyn iri jobalar týraly aıtty, dep habarlaıdy Kazinform.
«Qazaqstannyń ońtústiginde, ıaǵnı, ońtústik energetıkalyq aımaǵynda keń kólemde energetıkalyq nysandardy iske qosý josparlanyp otyr. Ol boıynsha eń aldymen Túrkistan oblysynda qýaty 1 gıgavattyq bý-gaz qondyrǵylary salynatyn bolady», - dedi Energetıka mınıstri.
Almatydaǵy úsh jylý elektr ortalyǵy da qýatyn arttyra otyryp, gazǵa aýystyrylatyn bolady.
«Búgin biz energııa obektileriniń qys mezgiline daıyndyǵyn tekserip, kompanııa basshylyǵynyń ınvestıtsııalyq mindettemelerdi iske asyrý jáne oryndaý jónindegi josparyn tyńdadyq. Qazir onda bári bekitilgen kestege sáıkes júrip jatyr. Aldaǵy ýaqytta qýatty arttyrý josparlanyp otyr, ıaǵnı árbir stantsııa qýatyn 30 %-dan 40% - ǵa deıin ulǵaıtatyn bolady», - dedi Almasadam Sátqalıev.
Sondaı-aq Qapshaǵaı sý elektr stantsııasynyń kontr rettegishin salý josparlanyp otyr. Onda shamamen óziniń 40 megavattyq qýaty bar. Ol sýdy tıimdi paıdalanýdyń esebinen Qapshaǵaı SES-ynyń 100-den artyq megavatyn paıdalanýǵa múmkindik beredi.
«Elektr energııasynyń jańartylǵan kózderin aýqymdy iske qosý josparlanyp otyr. Onyń ishinde birqatar shaǵyn jáne orta SES-terdiń jobalary bar. Bul rette Jambyl, Jetisý oblystarynda, qazirgi tańda kóptegen jobany iske asyrý jumystary bastaldy. Bul rette Energetıka mınıstrligi tarapynan biz tıisti konkýrstardy jarııalaýdy josparlap otyrmyz», - dedi Almasadam Sátqalıev.
Sondaı-aq kún men jel energııasy jobasy boıynsha Jońǵar qaqpasynda jel parki salynyp jatyr.
«Saýda Arabııanyń ACWA Power («Akva paýer») kompanııasy atalǵan jobany iske asyryp jatyr. Jel parkiniń qýaty 1 gıgavattqa jetetin bolady. Sonymen qatar elektr energııasyn tutyný ortalyqtaryna jetkizýdi qamtamasyz etý úshin elektr jelilerin damytý josparlanǵan. Bizde mundaı baǵdarlama bar jáne biz onyń iske asýyn baqylaıtyn bolamyz», - dedi Enegretıka mınıstri Almasadam Sátqalıev.
