Túrkistan oblysynda qýańshylyqtan mal qyrylyp jatyr degen aqparat shyndyqqa janaspaıdy – ákimdik

TÚRKІSTAN. KAZINFORM – Túrkistan oblysynyń ákimdigi áleýmettik jelilerde taraǵan, Keles aýdanynda qýańshylyq saldarynan tórt túliktiń qyrylyp jatqany týraly aqparatty teriske shyǵardy.

Áleýmettik jelide keıbir qoldanýshylar óńirde aptap ystyqtyń saldarynan ondaǵan maldyń qyrylǵanyn aıtyp, jaǵdaıdyń ýshyǵyp turǵanyn alǵa tartqan bolatyn. Alaıda bul aqparatty oblystyq ákimdiktiń baspasóz qyzmeti resmı túrde joqqa shyǵardy.

— Maldyń jappaı qyrylyp jatqany jáne jergilikti bıliktiń kómek kórsetýden bas tartqany týraly aqparat shyndyqqa janaspaıdy jáne jalǵan. Túrkistan oblysynda qýańshylyq pen shegirtkeniń shabýylyna baılanysty maldyń qyrylý derekteri tirkelgen joq. Búgingi tańda jem-shóp bazasyna qatysty jaǵdaı tolyq baqylaýda. Qýańshylyqqa qatysty málimetter de burmalanǵan, — delingen ákimdik taratqan habarlamada.

Sondaı-aq, Túrkistan oblysynyń ákimdigi turǵyndardy jalǵan aqparat taratýdan saq bolýǵa jáne tek resmı derekkózderge súıenýge shaqyrdy.

— Jergilikti bılik ókilderi fermerlermen únemi baılanysta. Árbir naqty ótinish boıynsha jergilikti jerge baryp, jaǵdaı zerdelenedi, qajettilik týyndaǵan jaǵdaıda kómek kórsetiledi — balamaly jaıylymdar usyný, shópti belgilengen baǵamen satatyn oryndar uıymdastyrý, logıstıkalyq qoldaý kórsetý jáne taǵy basqa sharalar júzege asyrylady. Rastalmaǵan aqparat taratý — óńirdiń bedeline nuqsan keltirip qana qoımaı, áleýmettik turaqsyzdyq týyndatady. Aqparat quraldaryn tek resmı derekkózderge jáne tekserilgen málimetterge súıenýge shaqyramyz, — delingen aqparatta.

Ákimdiktiń málimetinshe, maýsym aıynyń basyndaǵy anomaldy ystyqqa qaramastan, sýarmaly egis alqaptarynyń kóp bóliginde ylǵal jetkilikti. Tamshylatyp jáne jerasty sýarý júıeleri bar aımaqtarda ónimge qaýip tónip turǵan joq. Aýyl sharýashylyǵy taýaryn óndirýshilermen birlese otyryp, jergilikti atqarýshy organdar sýarý kózderin ártaraptandyrý jáne mal azyǵyn aldyn ala daıyndaý boıynsha sharalar qabyldaǵan. Shegirtkege qarsy kúres te jalǵasyp jatyr. Bıyl oblysta 700 myń gektardan astam aýmaqta zııankesterge qarsy óńdeý jumystary júrgizilgen. Zııankesterge qarsy monıtorıng jáne kúres jumystary jalǵasyp jatyr. Áleýmettik jelilerde taraǵan «shegirtkelerdiń jappaı shabýyly» beıneleri de shyndyqqa janaspaıdy. Ákimdik ókilderi bul vıdeolardyń kópshiligi ózge óńirlerde nemese shet elderde túsirilgenin alǵa tartty.

Aıta keteıik, budan buryn Túrkistan oblysynda qýańshylyq saldarynan egistik kúıip, mal azyǵy qymbattaǵanyn jazǵan bolatynbyz.