Túrkistan oblysynda qosymsha jer telimderinde shegirtkege qarsy óńdeý sharalary júrgiziledi
ASTANA. KAZINFORM – Óńdelgen 260 myń gektardan basqa, óńirde 50 myń gektardan astam taralý ýchaskeleri anyqtaldy. Qosymsha óńdeý Túrkistan oblysynyń Arys qalasynda, Saryaǵash, Keles, Ordabasy jáne Shardara aýdandarynda júrgiziledi. Bul týraly Úkimettiń baspasóz qyzmeti habarlady.
8 maýsymda shegirtkeniń taralýyna qarsy is-qımyl jónindegi ortalyq jedel shtab otyrysynda vıtse-premer Serik Jumanǵarın óńirlerdegi jaǵdaı týraly baıandamalardy tyńdady.
Túrkistan oblysy ákimdiginiń aqparaty boıynsha, qosymsha óńdeý 70 birlik jerústi tehnıkasynyń kómegimen júrgizilýde, oǵan qosa qosymsha 4 ushaq keldi. Qazirgi ýaqytta barlyq qajetti tehnıka kókónis-baqsha daqyldary alqaptarynyń aınalasynda shoǵyrlanǵan. Búgingi tańda egistikke zııan kelgen joq.
Aqtóbe oblysynyń Áıteke bı aýdanynda shegirtke dernásilderi kóbeıe bastady. Óńdeýge arnalǵan tehnıka daıyn. Jalpy oblysta 76 birlik tehnıkany paıdalana otyryp, óńirdiń 12 aýdanynda 281 myń gektar jerge hımııalyq óńdeý júrgizildi. Shegirtkeniń paıda bolý oryndaryn tekserý jáne anyqtaý úshin 600-ge jýyq adam tartyldy. Olar fıtosanıtarııalyq ınspektsııa, ákimdik qyzmetkerleri jáne ýaqytsha qyzmetkerler. Shegirtkeniń belsendi ósý kezeńinde jumysty kúsheıtý úshin ákimdikke taǵy 14 birlik tehnıka qajet.
Qostanaı oblysynyń bes aýdanynda 29,4 myń ga aýmaqta hımııalyq óńdeý júrgizildi. Dernásilderdiń kóbeıý oryndaryna monıtorıng jasaý jáne anyqtaý úshin 129 tekserýshi jáne 326 ýaqytsha qyzmetker tartyldy. 72 birlik tehnıka ázir tur. Shegirtkege qarsy kúres jumystary fermerlermen birlesip júrgizilip jatyr.
«Biz bıylǵydaı shegirtkeniń taralý aımaǵyn buryn-sońdy kezdestirgen emespiz. Biz onyń taralýynyń yqtımal saldaryn jete baǵalamaımyz. AShM Memlekettik ınspektsııa komıtetine barlyq rásimdik máselelerdi dereý aıaqtaýdy jáne barlyq qajetti tehnıkany atalǵan óńirlerge jiberýdi tapsyramyn. Qarbalas ýaqytta biz shtab otyrysyn aptasyna eki ret ótkizetin bolamyz», - dep túıindedi Serik Jumanǵarın.
