Túrkistan oblysynda kópirge jaqyn jol jıegi opyrylyp qaldy
TÚRKІSTAN. KAZINFORM — Jetisaı aýdany Jetiqazyna eldimekeni mańyndaǵy oblystyq mańyzy bar joldyń bir bóliginde asfaltqa japsarlas jatqan jol jıegi opyrylyp, topyraǵy tómen qaraı shókti.
Áleýmettik jelide taraǵan beınejazbada qaýipti jaǵdaı týyndaǵan jerdiń kópir mańynda ekeni kórinedi.
Eralıev aýyldyq okrýgine qarasty Jetiqazyna eldimekeni tusynan ótetin jol oblystyq mańyzy bar KH-75 «Maqtaly — Asyqata» avtomobıl joly.
Aýdan ákimdiginiń málimetinshe, eldimeken tusyndaǵy 31+500 shaqyrym bóliginde jol jıeginiń opyrylyp, tómen qaraı shógýi anyqtalǵan.
— Atalǵan jol oblystyq jolaýshylar kóligi jáne avtomobıl joldary basqarmasyna qarasty «Ońtústik joldary» mekemesiniń teńgeriminde tur. Qazirgi ýaqytta joldyń menshik ıesi tarapynan atalǵan aýmaqta qalpyna keltirý jumystary júrgizilip jatyr, — dep habarlady aýdan ákimdigi.
Sonymen qatar, jol qozǵalysy qaýipsizdigin qamtamasyz etý maqsatynda qajetti jol belgileri ornatylyp, tıisti qaýipsizdik sharalary qabyldanǵan.
Jaýapty mekeme ókilderiniń aıtýynsha, jaǵdaı baqylaýda.
Budan buryn Túrkistan oblysy Keles aýdanyna qarasty Qoshqarata aýyldyq okrýgi aýmaǵynda, Keles ózeni arqyly ótetin oblystyq mańyzy bar KH-20 avtojolyndaǵy kópir qulaǵanyn jazǵan edik.
