Túrkistan oblysynda kópirden sekirmek bolǵan oqýshyny polıtseıler qutqaryp qaldy
TÚRKІSTAN. KAZINFORM – Telefonyn alyp qoıǵandyqtan ákesine ashýlanǵan jasóspirim kópirden sekirmekshi boldy.
Oqıǵa Saýran aýdanynda boldy. 102 baılanys nomerine habarlasqan beıtanys adam Shymkent-Túrkistan baǵytyndaǵy kópirden jasóspirim qyzdyń sekirýge árekettenip jatqanyn aıtqan. Oqıǵa ornyna jedel jetken ýchaskelik polıtsııa ınspektorlary Erǵazy Júnisov pen Marat Áýezov jáne Bahrom Hashımov birden qutqarý jumystaryn júrgizdi.
Biri onymen sóılesip, qatelik jasamaýǵa shaqyrsa, endi biri qutqarýdyń amaldaryn qarastyrdy. Qolaıly sát týǵanda ekinshi polıtseı jasóspirimdi shapshańdyqpen qushaqtap, qaýipsiz aýmaqqa alyp shyqty.
«Qyraǵylyq pen jedel árekettiń arqasynda polıtseıler 9 synyp oqýshysyn qutqaryp qaldy. Belgili bolǵandaı, qyzdyń ákesi uıaly telefonyn alyp qoıýynyń saldarynan aralarynda kıkiljiń týyndap, jasóspirim qyz oılanbastan osy qadamǵa barǵan. Kámeletke tolmaǵan qyz ben onyń ata-anasyna túsindirý jumystary júrgizildi. Ákesi qyzyn aman alyp qalǵan tártip saqshylaryna rııasyz alǵysyn bildirdi», - delingen Túrkistan oblysy polıtsııa departamentiniń baspasóz qyzmeti taratqan aqparatta.
