Túrkistan oblysynda kópir qulady
TÚRKІSTAN. KAZINFORM – Aldyn ala málimetke sáıkes, kópirdiń uzaq jyl boıy paıdalanylǵandyqtyn jáne tirek baǵanalarynyń túbiniń shaıylýy saldarynan qaýip týyndaǵan.
Túrkistan oblysy Keles aýdanyna qarasty Qoshqarata aýyldyq okrýgi aýmaǵynda, Keles ózeni arqyly ótetin oblystyq mańyzy bar KH-20 avtojolyndaǵy kópir qulady.
– Atalǵan jaǵdaıǵa baılanysty aldyn ala qaýip belgileri anyqtalyp, der kezinde qabyldanǵan sheshimderdiń nátıjesinde kópir arqyly kólik qozǵalysy tolyq toqtatylǵan bolatyn. Sonyń arqasynda adam shyǵyny men materıaldyq zalalǵa jol berilgen joq, – delingen aýdan ákimdigi usynǵan aqparatta.
Kópir boıymen «Darbaza TSJ» qarasty sý qubyry ótken, ol zaqymdanǵan. Sý qubyry qalpyna keltirilgenge deıin Qoshqarata aýyldyq okrýgi Ushqyn eldimekenindegi 137 abonentti aýyz sýmen qamtamasyz etý úshin sý tasymaldaý uıymdastyryldy.
Kópir oblystyq «Ońtústik joldary» MKK-niń menshiginde. Onyń uzyndyǵy — 70 m, eni — 10 m, bıiktigi — 6,5 m.
Nysan 1970 jyldary salynǵan, 2010 jyly ortasha jóndeý jumystary júrgizilgen. 2024 jyly «Ońtústik joldary» MKK tarapynan kópirdiń jaǵalaýlary betonmen bekitilgen. Qaýipti jaǵdaıdyń aldyn alý boıynsha, aýdan tarapynan kópirge jóndeý jumystaryn qajet etetini boıynsha tıisti usynymdar oblysqa usynylǵan.
Qazirgi ýaqytta aınalma jol uıymdastyryldy, jergilikti turǵyndarmen túsindirý jumystary júrgizilip jatyr.
Turǵyndardyń qaýipsiz ári úzdiksiz qatynaýyn qamtamasyz etý maqsatynda Alpamys batyr jáne Birtilek aýyldyq okrýgteri arqyly ótetin 10-15 shaqyrymdyq aınalma jol qaraldy.
Aldaǵy ýaqytta kópirdi qalpyna keltirý jáne kólik qatynasyn qaıta jolǵa qoıý maqsatynda keshendi sharalar qabyldanady.
Budan buryn Saryaǵash shıpajaıynan aqqan káriz sýy Keles ózenine quıylyp jatqanyn jazǵan bolatynbyz.