Túrkistan oblysynda «Qonys aýdarý» jármeńkesi ótip jatyr
TÚRKІSTAN. KAZINFORM - «Jumys kúshiniń mobıldiligin arttyrý úshin erikti túrde qonys aýdarýǵa járdemdesý» baǵyty sheńberinde Soltústik Qazaqstan jáne Pavlodar oblystary ókilderiniń qatysýymen «Qonys aýdarý» jármeńkesi ótti.
Jetisaı qalasynda ótken is-sharaǵa 250-ge jýyq turǵyn qatysty. «Qonys aýdarý» jármeńkesine Jetisaı aýdan ákiminiń orynbasary Serik Pirimbekov pen «AMANAT» partııasy Jetisaı aýdandyq fılıalynyń atqarýshy hatshysy Asqar Qaınazarov qatysty. Jármeńke barysynda Soltústik Qazaqstan jáne Pavlodar oblystarynan kelgen delegatsııa músheleri óńirlerdiń jaı-kúıimen, jergilikti azamattardyń tynys-tirshiligimen, óńirdiń perspektıvasymen tanystyrdy.
Qonys aýdarýǵa nıetti azamattarmen tildesip, memleket soltústik oblystarǵa qonys aýdarǵan azamattardyń otbasy múshelerine bir ret 70 AEK (258 440 teńge) mólsherinde aqsha, alǵashqy ýaqytta úı jaldaýǵa qarjy beriletinin, sonymen qatar, qysqa ýaqytqa kásibı oqýǵa jiberip, jumysqa turǵyzý, jeńildikpen baspana alýǵa kómektesýdi mindetine alatynyn túsindirdi.
Nasıhat toby Maqtaaral, Saryaǵash, Keles, Qazyǵurt aýdandarynyń turǵyndarymen de kezdesti. Onda da Soltústik óńirdegi aýyl aımaqtyń tirshiligi jóninde keń kólemdi málimet bergen sala mamandary, kópshilikti jumys kúshi az aımaqqa qonys aýdarýǵa shaqyrdy.
«Soltústiktegi jaǵdaımen tanysyp jatyrmyz. Egerde kóńilimizden shyqsa qonys aýdarýǵa daıynbyz. Ózim maquldap otyrmyn. Ákimdik jumys taýyp berse, kómektesse barýǵa bolady. Qazir sharttarymen tanysyp jatyrmyn. Eki-úsh jyldan beri atalǵan baǵdarlamany estip kelemin. Ońtústik pen Soltústiktiń aıyrmashylyq joq dep oılaımyn. Barlyǵy qazaqtyń jeri. Bizdiń Otanymyz. Sodan nar táýekel etip otyrmyn», - dedi jergilikti turǵyn Erhan Berdibekov.
Qazaqstan Eńbek jáne halyqty áleýmettik qorǵaý mınıstrligi 2024 jylǵa respýblıka boıynsha 7050 kvota bólip, qandastar men qonys aýdarýshylar úshin memlekettik qoldaý kórsetetin 7 oblys belgilengen bolatyn. Olardyń qatarynda Soltústik Qazaqstan oblysy (2 702 adam), Pavlodar oblysy (2 603 adam), Qostanaı oblysy (950 adam), Shyǵys Qazaqstan oblysy (372 adam), Abaı oblysy (255 adam), Ulytaý oblysy (132 adam), Qaraǵandy oblysy (36 adam).
Bólingen kvota negizinde osy jyldyń 8 aıynda Túrkistan oblysynan 288 otbasydan 1 116 adam qonys aýdardy. Naqty kórsetsek, Shyǵys Qazaqstan oblysyna 18 otbasy (71 adam), Qostanaı oblysyna 18 otbasy (71 adam), Pavlodar oblysyna 127 otbasy (592 adam), Soltústik Qazaqstan oblysy 110 otbasy (318 adam), Qaraǵandy oblysyna 2 otbasy (11 adam), Abaı oblysyna 8 otbasy (23 adam), Ulytaý oblysyna 5 otbasy (30 adam).
Jalpy elimiz boıynsha 3 494 qonys aýdarǵandardyń 32%-y Túrkistan oblysynyń úlesinde. Olardyń ishinde eńbekke jaramdy 538 adamnyń 304-i jumysqa ornalasqan. 2015 jyldan beri jumys kúshi az Soltústik óńirlerine halqy tyǵyz ornalasqan Ońtústik aımaqtardan azamattardy kóshirý jumystary nátıjesinde búgingi kúnge deıin 14 874 adam nemese 3 358 otbasy qonys aýdarǵan.
Memleket soltústik oblystarǵa qonys aýdarǵandardyń otbasy múshelerine bir ret 70 AEK (258 440 teńge) mólsherinde aqsha, alǵashqy ýaqytta úı jaldaýǵa qarjy beredi. Budan bólek, bılik olardy qysqa ýaqytqa kásibı oqýǵa jiberip, jumysqa turǵyzýy, jeńildikpen baspana alýǵa kómektesýi tıis. Al qonys aýdarǵandarǵa jumys usynǵan jumys berýshilerge 400 AEK (1 476 800 teńge) sýbsıdııa beriledi.
«Qonys aýdarý» jármeńkesi erteń Túlkibas, Ordabasy, Saıram, Báıdibek aýdandarynda ótedi.
