Túrkistan oblysynda kommýnaldyq kásiporyn jylý tarıfin birneshe ese negizsiz kótergen
TÚRKІSTAN. KAZINFORM — Bıyl departament tarapynan zańnamany buzý deregi boıynsha 4 tergeý júrgizilgen. Nátıjesinde 55 mln teńge kóleminde ákimshilik aıyppul salynǵan.
Básekelestikti qorǵaý jáne damytý agenttiginiń Túrkistan oblystyq departamentiniń málimetinshe, jyl basynan beri óńirde 62 kásiporynǵa monıtorıng júrgizilip, 58 zań buzýshylyq anyqtalǵan.
— Kentaý qalasyndaǵy «Kentaý-Servıs» mekemesine júrgizilgen tekserý barysynda 1 tekshe metr jylytý alańy úshin baǵany 33 teńgeden 125 teńgege deıin negizsiz kótergeni anyqtaldy. Atalǵan kásiporynǵa 34 mln teńgeden astam kólemde ákimshilik hattama toltyrylyp, quqyqbuzýshylyqty joıý jóninde nusqama berildi. Osy is boıynsha departamenttiń paıdasyna sot sheshimi shyǵaryldy, — dedi departament basshysy Álibı Turysbaev baspasóz máslıhatynda.
Sondaı-aq bıyl departament qyzmetkerleri júrgizgen tekserister nátıjesinde jalpy 80 ákimshilik hattama toltyrylǵan.
Budan buryn Túrkistanda jol sapasyna salǵyrt qaraǵan merdigerler mekemelerge aıyppul salynǵanyn jazǵan edik.