Túrkistan oblysynda kókparshylar daýys berdi

TÚRKІSTAN. KAZINFORM – Ulttyq sportty janyna serik etip júrgen jigitter elimizde ótip jatqan saıası naýqanǵa belsendi qatysty.

Saptama etik kıip, tobylǵy qamshy ustaǵan kókparshylar Baıyldyr aýylynda ornalasqan №48 referendým ýchaskesine jylqy minip keldi. Óz tańdaýlaryn jasaǵan soń, kópshilikti referendýmǵa belsene qatysýǵa shaqyrdy.

«Búgingi kún biz úshin jaýapty kún boldy. Sondyqtan kókparshylar jınalyp, birge baryp daýys berýdi jón kórdik. Jalpy saıası naýqanǵa árkim jaýapkershilikpen qarap, el erteńi úshin daýys berýi qajet dep esepteımin», – deıdi Danııar Aldabergen.

Kentaý qalasyna qarasty Hantaǵy aýylynda ornalasqan referendým ýchaskesinde de kókparshylar óz tańdaýyn jasady.

«Biz búgin referendýmǵa birinshi ret qatysyp otyrmyz. Daýys berý ýchaskesine at minip kelýdegi sebebimiz – kókparshylar da el bolashaǵyna beı-jaı qaramaıtyndyǵyn kórsetkimiz keldi» – deıdi Dıas Qaldybaı.

Maqtaaral aýdanynda da kókparshylar referendým ýchaskesine top-top bolyp kelip daýys berdi.

Osyǵan deıin referendýmda qaraǵandylyq baıkerlerdiń daýys bergenin jazdyq.