Túrkistan oblysynda kókparshy jigitter daýys berýge keldi
TÚRKІSTAN. KAZINFORM — Sozaq aýdanyna qarasty Jartytóbe aýylyndaǵy № 695 referendým ýchaskesinde aýyl jastary daýys berýge atpen keldi.
Ulttyq dástúrdi dáriptegen jastar ýchaskege salt atpen kelip, óz tańdaýlaryn jasady. Olar el bolashaǵyna beıjaı qaramaıtyndyqtaryn tanytty.
Bul bastama aýyl turǵyndarynyń nazaryn aýdaryp, daýys berý kúnine erekshe kórik berdi. Jastardyń ulttyq naqyshtaǵy áreketi kópshilikke kóterińki kóńil kúı syılap, merekelik atmosfera qalyptastyrdy.
Aýyl jastarynyń aıtýynsha, mundaı bastama ulttyq qundylyqtardy nasıhattaýmen qatar, jastardyń qoǵamdyq-saıası naýqandarǵa belsendi qatysýyna yqpal etedi.
— Búgin biz elimizdiń bolashaǵy úshin óz tańdaýymyzdy jasadyq. Ár azamattyń daýysy mańyzdy, pikiri qundy dep sanaımyz. Barshańyzdy daýys berýge shaqyramyz, — dedi kókparshy Mádı Seıdýllaev.
Aıta keteıik, atalǵan ýchaskede turǵyndar referendýmǵa belsendi qatysyp, azamattyq ustanymdaryn bildirip jatyr.
Budan buryn Túrkistan oblysynda 37 myńnan astam jas alǵash ret daýys beretinin jazǵan edik.
