Túrkistan oblysynda kókpardan keıin jas jigit aýyr soqqyǵa jyǵyldy

TÚRKІSTAN. KAZINFORM – Áleýmettik jelide Túrkistan oblysynda 20 jastaǵy jigittiń kókpardan keıin aıaýsyz soqqyǵa jyǵylǵany týraly aqparat tarady.

Jelidegi málimetterge sáıkes, Saıram aýdanynda bir top adam jas jigitti qorshap alyp, soqqyǵa jyqqan. Janjal kúndiz kókpar alańynda bastalyp, keshke ony kóshege sóılesýge shaqyrǵan. 

Atalǵan oqıǵaǵa baılanysty Túrkistan oblysy Polıtsııa departamenti túsinik berdi.

Vedomstvo málimetinshe, 7 aqpan kúni polıtsııaǵa Saıram aýdanynyń turǵyny dene jaraqatymen aýrýhanaǵa jetkizilgeni týraly habarlama túsken.

— Polıtsııa qyzmetkerleri qajetti is-sharalardy atqaryp, janjaldyń barlyq qatysýshylaryn, sondaı-aq oqıǵanyń kýálaryn anyqtady. Buzaqylyq faktisimen qylmystyq is qozǵaldy. Kúdikti retinde eki jergilikti turǵyn ustaldy, — delingen oblystyq PD habarlamasynda.

Sot ustalǵandarǵa qatysty úıqamaq túrindegi bultartpaý sharasyn qoldanǵan.

— Oqıǵanyń barlyq mán-jaıyn jan-jaqty ári obektıvti anyqtaýǵa baǵyttalǵan tergeý áreketteri jalǵasyp jatyr. Týystarynyń ýájderi zerttelip, tekseriledi, — dep málimdedi vedomstvo.

Qazirgi ýaqytta jábirlenýshi medıtsınalyq mekemede em qabyldap jatyr.

Tergeý qorytyndysy boıynsha quqyqtyq baǵa berilip, protsessýaldyq sheshim qabyldanady.

Budan buryn Saıram aýdanynda 8 adam bóten úıge basyp kirip, búkil otbasyn soqqyǵa jyqqanyn jazǵan edik.