Túrkistan oblysynda qoǵamdyq oryndardy lastaǵan 10 myńnan astam adamǵa aıyppul salyndy
TÚRKІSTAN. KAZINFORM - Qoǵamdyq oryndar men kóshede jasalǵan qylmystardyń sany boıynsha Túrkistan, Kentaý qalalary men Saryaǵash, Saıram, Jetisaı, Tólebı aýdandary kósh bastap tur. Atalǵan másele Túrkistan oblysy ákimdigi janyndaǵy quqyq buzýshylyq profılaktıkasy jónindegi vedomstvoaralyq komıssııasynyń otyrysynda jan-jaqty talqylandy.
Óńirde beınekameralardyń kómegimen jyl basynan beri 100 qylmys ashylyp, 10 myńnan astam ákimshilik quqyq buzýshylyq anyqtalǵan. Máselen, kámeletke tolmaǵandar jasaǵan vandalızm faktileri kóshedegi beınekameralarǵa túsip qalǵan. Atap aıtar bolsaq, avtobýs aıaldamasynyń áınegin, kóshedegi trenajer men oıyn avtomatyn syndyrǵandarǵa qatysty zańdy sheshim qabyldandy. Bıyl taǵy 450 beınekamera ornatý josparlanyp otyr.
Oblystyq Polıtsııa departamenti bastyǵynyń birinshi orynbasary Baǵlanbek Aıtbaevtyń sózine súıensek, Túrkistan oblysy boıynsha qoǵamdyq oryndar men kóshelerde 42 427 ákimshilik quqyq buzýshylyqtardyń joly kesilgen. Al, ortaq paıdalanylatyn oryndardy lastaý faktisi boıynsha 10 614 jaǵdaı anyqtalǵan. Qalalar men eldi mekenderdiń aýmaǵyn abattandyrýǵa zııan keltirgen 3 736 buzýshylyq faktisi tirkelgen.
Al qabyldanǵan sharalardyń nátıjesinde osy jyldyń 5 aıynda qoǵamdyq oryndarda jasalǵan qylmystar sany 43-ke tómendep otyr. Jalpy qoǵamdyq oryndar men kóshede jasalǵan qylmystardyń sany boıynsha Túrkistan, Kentaý qalalary men Saryaǵash, Saıram, Jetisaı, Tólebı aýdandary kósh bastap tur. Qylmystardyń basym bóligi túngi ýaqytta jaryqpen qamtamasyz etilmegen oryndarda jasalǵan.
Maýsym aıynyń 20-sy men 30 kúnderi respýblıka kóleminde «Quqyqtyq tártip» is-sharasynyń 3 kezeńi ótýde. Jeke quram qoǵamdyq oryndar men kóshelerde qylmystardy boldyrmaý, onyń ishinde jasóspirimdermen, olarǵa qatysty quqyq buzýshylyqtardyń jolyn kesý baǵytynda jan jaqty jumys istep jatyr.
Komıssııasynyń otyrysynda quqyq buzýshylyqtyń aldyn alý máselesin sheshý tek polıtsııanyń kúshimen múmkin emes ekenin aıtqan oblys ákimi Darhan Satybaldy jergilikti jerlerde birlesken jumystardy atqarý qajettigin jetkizdi. Sondaı-aq, qylmysty tómendetý boıynsha tıisti memlekettik organdarmen birlese naqty sharalar qabyldaýdy, osy baǵytta jumysty jalǵastyryp, qoǵamdyq qaýipsizdikti qatań baqylaýda ustaýdy tapsyrdy.
