Túrkistan oblysynda qyzylshamen naýqastanyp jatqan balalar kóp
Túrkistan oblysynda qyzylshamen naýqastanyp jatqan balalar kóp, dep habarlaıdy Kazinform.
Túrkistan oblysynda naýryz aıynan búgingi kúnge deıin qyzylshaǵa kúdikti 984 jaǵdaı tirkelgen. Onyń 360-nyń dıagnozy zerthanalyq jáne klınıkalyq túrde rastalyp otyr.
Túrkistan oblysy sanıtarııalyq-epıdemıologııalyq baqylaý departamenti basshysynyń orynbasary Bahtyoraz Elemesovtiń aıtýynsha qazirgi kezde óńirde ınfektsııanyń joǵary tirkelýi jalǵasyp jatyr. Ásirese, balabaqshalar men mektepterde atalǵan dertti juqtyryp jatqandar kóp.
«Naýqastardyń barlyǵynda derlik ınfektsııa JRVI sımptomdarymen, ıaǵnı dene temperatýrasy 39-40S deıin joǵarylaýy, qurǵaq jótel, kózderiniń jasaýraýy, isinýi, jalpy álsizdik, tábetiniń joq bolý belgilerimen bastalǵan. Naýqastardyń bas jáne bet bólikterine, denelerine daqty-papýlezdi bórtpeler shyǵýda», - dedi Bahtyoraz Elemesov.
Mamandardyń aıtýynsha, óńirde qyzylsha juqtyrǵandardyń 88 paıyzyn 14 jasqa deıingi balalar quraǵan. Ásirese, aralarynda 4 jasqa deıingi búldirshinder kóp.
Búgin oblys aýmaǵynda qyzylsha aýrýshańdyǵynyń aldyn-alý, epıdemıologııalyq jaǵdaıdy budan ári turaqtandyrý maqsatynda óńirdiń Bas memlekettik sanıtarııalyq dárigeriniń «Sanıtarııalyq-epıdemııaǵa qarsy jáne sanıtarlyq-profılaktıkalyq qyzylshaǵa qarsy is-sharalar týraly» qaýlysy shyqty.
Qaýly boıynsha qyzylshaǵa qarsy egý mártebesine qaramastan, 6 aıdan bastap 10 aı 29 kúnge deıingi, 2 jastan bastap 4 jas 11 aı 29 kúnge deıingi balalarǵa qosymsha jappaı ımmýndaý júrgiziledi.
