Túrkistan oblysynda qyzylsha dendep tur

Túrkistan oblysynda jyl basynan 166 adam qyzylsha juqtyrdy, onyń 146 – balalar. Bul týraly óńirlik Sanıtarııalyq-epıdemıologııalyq baqylaý departamenti basshysynyń orynbasary Bahtyoraz Elemesov málim etti, dep habarlaıdy Kazinform.

Túrkistan oblysynda qyzylsha aýrýy dendep tur. Máselen atalǵan vırýsty juqtyrdy degen kúdikpen 373 adam tirkeldi. Zerthanalyq jumystardyń nátıjesinde 166 naýqastyń dıagnozy rastaldy. Onyń ishinde 14 jasqa deıingi 146 bala bar.

Ordabasy aýdanynyń turǵyndary qyzylshaǵa shaldyqqandar arasynda aldyńǵy orynda tur. Aýrýshańdyq sondaı-aq Saýram, Saýran, Shardara jáne Qazyǵurt aýdandarynda kóp tirkelgen.

Mamandardyń sózine súıensek, qyzylshamen aýyrǵandardyń edáýir bóligi túrli sebeptermen vaktsına almaǵan. ıAǵnı – egýden bas tartqan, medıtsınalyq qarsy kórsetilimderi bar bolǵan nemese egý jasyna jetpegen.

«Qyzylsha – kóbine balalar arasynda jıi kezdesetin, aýa-tamshy joldary arqyly taraıtyn ınfektsııa. Kúz-kóktem mezgilderi epıdemııalyq maýsymdary bolyp sanalady. Adamnan adamǵa juǵýy óte joǵary. Aýrýdyń jasyryn kezeńi 7-21 kúndi quraıdy. Aýrý belgileri naýqaspen baılanysta bolǵannan keıin sýyq tııýdiń belgilerine uqsas sımptomdarmen biline bastaıdy», – deıdi Bahtyoraz Elemesov.

Sanıtarııalyq-epıdemıologııalyq baqylaý departamentiniń baspasóz qyzmeti Kazinform tilshisine málim etkendeı, byltyr óńirde qyzylshanyń birde-bir faktisi tirkelmegen.