Túrkistan oblysynda qyzylsha aýrýshańdyǵy tómendedi
Túrkistan oblysynda 55 myńnan astam bala qyzylshaǵa qarsy qosymsha jappaı ımmýndaý aldy, dep habarlaıdy Kazinform.
Túrkistan oblysynda qyzylshaǵa qarsy qosymsha jappaı ımmýndaý qarqyndy júrgizilýde. Qazirgi kezde óńirge qosymsha 83000 doza vaktsına jetkizildi. Buǵan deıin 14700 dana ekpe kelgen bolatyn.
Jalpy, jyl basynan beri oblysta 2982 adam «qyzylsha juqtyrdy» degen kúdikke ilingen. Zerthanalyq jáne klınıkalyq tekserýlerdiń barysynda onyń 1450 atalǵan dertpen naýqastanǵany dáleldenip otyr. Onyń ishinde 14 jasqa deıingi balalar sany 1237.
«Qazirgi tańda 55 712 bala qyzylshaǵa qarsy qosymsha jappaı ımmýndaý aldy. Bul vaktsına alýǵa tıisti balalardyń 30 paıyzyn quraıdy. Nátıjesinde, 5-shi jeltoqsan men 11-shi jeltoqsan aralyǵynda qyzylsha aýrýshańdyǵy 75,7 paıyzǵa tómendegeni baıqaldy. Qyzylsha aýrýynyń belgili bir emi joq, asqynǵan jaǵdaıdarda ólimge ákelip soqtyrýy múmkin nemese larıngıt, qulaqtyń qabynýy, pnevmonııa, qyzylsha entsefalıti, mıdyń qabynýy sekildi taǵy basqa da asqynýlarǵa alyp kelýi múmkin. Sondyqtan, aýrýdyń aldyn alý úshin qyzylshaǵa qarsy qarsy ekpe alý kerek» - dedi Túrkistan oblysynyń SEBD basshysy N. Nyshanov.
