Túrkistan oblysynda Qyzylqum kanalyn rekonstrýktsııalaý jumystary bastaldy
ASTANA. KAZINFORM – Túrkistan oblysynda Qyzylqum magıstraldyq kanalyn rekonstrýktsııalaý jumystary qaıta jandandy. Jobany iske asyrý shamamen 20 myń adam turatyn Alataý batyr aýylyn sý basý qaýpin azaıtýǵa, sondaı-aq Shardara jáne Arys aýdandaryndaǵy 63 myń gektarǵa jýyq aýyl sharýashylyǵy alqabyn sýarmaly sýmen qamtamasyz etýdi jaqsartýǵa múmkindik beredi.
Sý resýrstary jáne ırrıgatsııa mınıstrliginiń málimetinshe, rekonstrýktsııa jumystarynyń qaıta qolǵa alynýy buryn bastalǵan sý sharýashylyǵy jobalaryn aıaqtaý baǵytyndaǵy júıeli jumystyń nátıjesi boldy. Bekitilgen algorıtm aıasynda ótken jyldary qurylysy bastalǵanymen, uzaq ýaqyt boıy aıaqtalmaı qalǵan 10 nysandaǵy jumystardy kezeń-kezeńimen aıaqtaý kózdelgen. Qyzylqum magıstraldyq kanaly – qurylys-montaj jumystary belsendi túrde qaıta jandanǵan alǵashqy nysandardyń biri.
Kanaldyń uzyndyǵy 3,8 shaqyrym bolatyn ýchaskesin rekonstrýktsııalaýǵa merdiger uıym 2026 jyldyń qazan aıynda, vegetatsııa kezeńi aıaqtalyp, sýarmaly sý berý toqtatylǵannan keıin kiristi. Jobany iske asyrý merziminiń tyǵyzdyǵy men áleýmettik-ekonomıkalyq mańyzyn eskere otyryp, mınıstrlik merdiger uıymmen birlesip, qajetti eńbek, tehnıkalyq jáne materıaldyq resýrstardy jumyldyrý sharalaryn qabyldady.
Qazirgi ýaqytta qurylys-montaj jumystary táýlik boıy úsh aýysymmen júrgizilip jatyr. Nysanda shamamen 250 maman men 50-den astam arnaıy tehnıka jumyldyrylǵan. Qurylys jumystarynyń úzdiksiz júrýin qamtamasyz etý úshin qajetti materıaldar men jabdyqtar tolyq kólemde jetkizilip jatyr.
Qurylys alańyna beton qospasyn úzdiksiz daıyndap, jetkizýge jáne betondaý jumystaryn joǵary qarqynmen júrgizýge múmkindik beretin beton aralastyrǵysh qondyrǵy ornatylǵan. Jobaǵa sáıkes, kanal arnasynyń ishki beti betonmen qaptalady. Bul sý tasymaldaý kezindegi shyǵyndy edáýir azaıtyp, sý resýrstaryn paıdalaný tıimdiligin arttyrýǵa múmkindik beredi.
-Qyzylqum kanalyn rekonstrýktsııalaýdy aıaqtaý – mınıstrliktiń basym mindetteriniń biri. Qurylys jumystarynyń belgilengen kestege sáıkes júrgizilýine, oryndalatyn jumystardyń sapasyna jáne nysannyń ýaqytyly paıdalanýǵa berilýine erekshe nazar aýdarylyp otyr. Jobanyń iske asyrylý barysy turaqty baqylaýda, – dedi Sý resýrstary jáne ırrıgatsııa mınıstrligi Sý sharýashylyǵy komıtetiniń tóraǵasy Nurbek Serikov.
Osyǵan deıin sý shyǵynyn azaıtý úshin Qazaqstanda 746 kanal jańartylatyny týraly jazdyq.
