Túrkistan oblysynda qyzǵaldaq julǵan boıjetken jaýapqa tartylatyn boldy
TÚRKІSTAN. KAZINFORM - 22 jastaǵy qyz ózi julǵan qyzǵaldaqpen sýretke túsip, ony jelige júktegen.
Polıtsııa qyzmetkerleri «greıg» qyzǵaldaqtaryn julǵan ordabasylyq turǵyndy áleýmettik jeliler arqyly anyqtady. Ol Uıalyjar aýyldyq okrýgindegi alqapta Qyzyl kitapqa engen gúlderdi julyp, beınejazba túsirip, jelidegi paraqshasyna jarııalaǵan.
Atalǵan jaǵdaı sırek kezdesetin jáne joıylyp ketý qaýpi tóngen ósimdik túrlerimen zańsyz aınalysý faktisi boıynsha polıtsııa bóliminde tirkeldi.
«Barlyq jaǵdaı anyqtalyp jatyr. Túrkistan oblysynyń polıtsııasy «Greıg» qyzǵaldaqtaryn tamashalaýǵa kelgen turǵyndar men qonaqtarǵa Qyzyl kitapqa engen ósimdikterdi julǵany úshin zańda jaýapkershilik qarastyrylǵanyn eske salady», - delingen Túrkistan oblysy polıtsııa departamentiniń baspasóz qyzmeti usynǵan aqparatta.
Buǵan deıin habarlaǵanymyzdaı, Ordabasy aýdanynyń ortalyǵy Temirlan aýylynyń janyndaǵy bıdaı alqaby qyzǵaldaq aımaǵyna aınaldy.