Túrkistan oblysynda qyz alyp qashqandar ustaldy
TÚRKІSTAN. KAZINFORM – Túrkistan oblysynda boıjetkendi alyp qashý deregine qatysty áleýmettik jelide vıdeo tarady.
Oblystyq Polıtsııa departamentiniń málimetinshe, patrýldik polıtsııa batalonynyń qyzmetkerleri kúdik týdyrǵan Kia markaly avtokólikti toqtatqan. Kólik ishindegi boıjetkenniń qol bulǵap, kómek suraǵandaı ıshara jasaǵany baıqalǵan.
Kólik toqtatylǵan sátte boıjetken salonnan júgirip shyǵyp, polıtsııa qyzmetkerlerinen kómek suraǵan.
– Oqıǵanyń barlyq mán-jaıyn anyqtaý maqsatynda kólikte bolǵan azamattar polıtsııa bólimine jetkizildi. Atalǵan derek boıynsha nekege turýǵa májbúrleý faktisi boıynsha qylmystyq is qozǵaldy, – delingen resmı habarlamada.
Alaıda boıjetken keıin óziniń bolashaq jubaıymen qarym-qatynasy ózara kelisimge negizdelgenin aıtyp, oqıǵany aralaryndaǵy janjaldyń saldary dep túsindirip, aryz jazýdan bas tartqan.
Qazirgi ýaqytta atalǵan derek boıynsha jan-jaqty tekserý júrgizilip, oqıǵanyń barlyq obektıvti mán-jaıy anyqtalyp jatyr.
Buǵan deıin Túrkistan oblysynda stalkıng boıynsha 6 is sotqa joldanǵany týraly jazǵan edik.
