Túrkistan oblysynda qysqy soǵymdy qaryzǵa alýǵa bolady
Túrkistan oblysynda qysqy soǵymdy qaryzǵa alýǵa bolady, dep habarlaıdy Kazinform.
Kún sýytyp, kúz túskeli kópshilik qysqy soǵamdaryn qamdap jatyr. Sondyqtan, óńirde et baǵasy da qubylyp tur.
Bazardaǵy baǵa men mal bordaqylaıtyn sharýalardyń naryǵynda birshama aıyrmashylyq bar. Degenmen qos tarapta da etke suranys joǵary.
Jalpy qazirgi kezde bazardaǵy jylqy etiniń baǵasy kelisine 2600-2700 teńgeden túspeı tur. Sıyr men qoı eti de soǵan shamalas.
Al, mal bordaqylap satatyn sharýalardan jylqy etin 2200 teńgeden tabýǵa bolady.
Sondaı-aq, Túrkistan oblysynda qysqy soǵymdy qaryzǵa alýǵa da múmkindik bar.
«Jalaqydan beremin» dep kelisseńiz ár kelisine 100 teńgeden qosyp tóleısiz.
«Qazirgi kezde bizdegi jylqy eti 2200 teńgeden. Satyp alýshy qalada turatyn bolsa, úıine deıin jetkizip beremiz. Al aılyqqa jazdyrtatyn bolsa 2300 teńgeden berip jatyrmyz. Tutynýshylar arasynda jaǵdaıyna qaraı „jeltoqsan aıynyń jalaqysyna“, „qańtar aıynyń aılyǵyna“ dep jazdyratyndar bar», — deıdi sharýa Dımash Erkin.
Túrkistan oblysyndaǵy taǵy bir erekshelik — munda soǵymǵa túıe etin alatyndar da kóp. Máselen óńirdegi Sozaq, Otyrar aýdandarynyń turǵyndary túıe etin kóp tutynady.
«Bir kelisin 1700 teńgeden satamyz. Al, „aqshasyn jalaqy alǵanda beremiz“ dep kelisetinder úshin baǵa — 1900 teńge. Aýylda qysqy soǵym úshin bir túıeni tutas satyp alatyndar da bar. Ondaı kezderi túıeniń kelisine qarap baǵasyn shyǵaramyz» — deıdi sozaqtyq sharýa Nurbol Beısúgirov.
Búgin tańerteń jarnamalyq saıttardaǵy baǵalardy da salystyryp kórdik. Soǵymǵa arnalǵan jiliktiń kelisi 2500 teńgeden tur.
Al bir jylqy alatyn bolsańyz, qaltańyzda keminde 400 000 teńge bolýy kerek. Sodan bastap baǵa kóterile beredi.
Sondaı-aq, jarnamadan jilikti kóterme baǵada usynyp jatqandarmen de sóılesip kórdik.
«Eger 5 jilikten kóp alsańyz 2000 teńgege deıin jeńildik jasaımyz» — dedi soǵym satýshylar.
