Túrkistan oblysynda qys ortasynda 170-ten astam úı gazsyz qaldy

TÚRKІSTAN. KAZINFORM – «Gazel» avtokóliginiń júrgizýshisi jol qozǵalysy erejelerin óreskel buzyp, gaz taratý jelilerinde apatqa sebep boldy. Oqıǵa saldarynan 174 jeke turǵyn úı gazsyz qaldy. Qazirgi ýaqytta apattyq-qalpyna keltirý jumystary jalǵasyp jatyr.

Apat búgin Saryaǵash qalasynda boldy. Mamandardyń málimetinshe, avtokólik orta qysymdy gaz qubyryna zaqym keltirip, sonyń saldarynan turǵyn úı sektorynda gaz berý shuǵyl túrde toqtatylǵan.

Soqqy áserinen dánekerlengen qubyr tolyq ajyrap ketken. Sonymen qatar tórt tirek maıysyp, shamamen 10 metr gaz qubyry zaqymdanǵan.

– Keltirilgen zaqym turǵyndardyń qaýipsizdigine qater tóndirip, 174 jeke turǵyn úıdi gazben qamtýdan májbúrli túrde ajyratýǵa ákeldi, – dep habarlady «QazaqGaz Aimaq» AQ.

Kompanııa ókilderi 50 metr radıýstaǵy aýmaq tolyq tekserilgenin, gazdyń aǵýy anyqtalmaǵanyn naqtylady.

Oqıǵa ornynda apattyq-qalpyna keltirý jumystary jalǵasyp jatyr. Gaz berýdi qalpyna keltirý merzimi jóndeý jumystary men baqylaý tekseristeri aıaqtalǵannan keıin belgili bolady.

Kompanııadaǵylar mundaı oqıǵalardyń tikeleı adam faktorymen baılanysty ekenin atap ótti.

– Júrgizýshilerdiń qaýipsizdik erejelerin elemeýi ómirlik mańyzy bar ınfraqurylym nysandarynda apatqa ákelip, halyqty turaqty gazben qamtýǵa kedergi keltiredi, – dep málimdedi «QazaqGaz Aimaq» AQ ókilderi.

Jaǵdaıdy aýa raıynyń qolaısyzdyǵy da qıyndatyp otyr. Qańtar aıyndaǵy qalyptan tys jylymyqtan keıin Túrkistan oblysynda aıaz, qar jáne ekpindi jel bastaldy. Bul rette óńirdegi jeke sektor turǵyndarynyń basym bóligi úılerin gazben jylytady.

Budan buryn Almatyda jol apaty saldarynan ondaǵan úı gazsyz otyrǵanyn jazǵan edik.