Túrkistan oblysynda qyryqqabat pisti
TÚRKІSTAN. KAZINFORM – Jetisaılyq sharýalar qyryqqabattyń alǵashqy ónimin eksporttaýdy bastady.
Joldasbaı Eralıev aýyldyq okrýgindegi «Myrza ata» sharýa qojalyǵy qyryqqabattyń alǵashqy ónimin kórshiles Reseı eline eksporttap jatyr.
Qojalyq tóraǵasy Ábdijappar Myrzaevtyń aıtýynsha, bıyl ónim jaqsy, baǵa da joǵary. Meıramhanalar men dámhanalarda suranys artqan. Qazirdiń ózinde egistik basynan kelisin 175 teńgeden alyp ketip jatqandar kóp.
«Sońǵy birneshe jyldan beri 60 kúnde pisip jetiletin qyryqqabattyń «makako» sortyn egip kelemin. Bıyl alǵashqy ónimdi Reseıge jiberdik. Jergilikti turǵyndardy maýsymdyq jumystarǵa tartamyz. Qyryqqabat pisken kezde jınap beredi. Al, satyp alýshylar alqaptan kólikke tıep alyp ketip jatyr. Ónim jaqsy» - deıdi sharýa.
Jetisaı aýdandyq aýyl sharýashylyǵy jáne jer qatynastary bóliminiń basshysy Nurtas Tursynbekovtyń aıtýynsha, bıyl 1200 gektar aýmaqqa qyryqqabattyń erte pisetin «Zarısma», «Valıkor», «Magnýs», «Kevın Farao», «Rında», «Zakaz», «Makako» sorttary egilgen. Boljam boıynsha 36 myń tonna ónim alý josparlanyp otyr.
«Byltyr aýdan sharýalary 1200 myń gektar jerge qyryqqabat daqylyn egip, mol ónim aldy. Negizinen erte pisetin qyryqqabat óniminiń basym bóligi Reseı, Belarýs jáne Eýropa elderine eksporttalǵan bolatyn. Bıyl aýdanda 79,2 myń gektar aýmaqqa aýyl sharýashylyǵy daqyldary egiledi. Onyń ishinde 42 myń gektarǵa maqta, 19 myń gektar alqapqa baqsha, 3,5 myń gektar jerge kókónis pen 14 myń gektarǵa mal azyǵy daqyldaryn egý josparlanyp otyr» - dedi Nurtas Tursynbekov.
Búginde Keles aýdanynyń sharýalary da qyryqqabat jınap jatyr. Aqtóbe aýyldyq okrýgine qarasty Lesbek batyr aýylynyń turǵyny Nurmuhammed Omarov 15 jyldan beri baý-baqsha egýmen aınalysady. Bıyl sharýa 1 gektar sýarmaly egistik alqabyna qyryqqabat egip, 20 tonna ónim aldy. Qazir daıyn ónimdi Astana, Almaty, Shymkent qalalarynyń saýda oryndaryna jóneltip jatyr.
Al, «Ádilbek-E» JShS 20 gektar aýmaqqa qańtar aıynda qyryqqabattyń erte pisetin «Farao» sortyn ekken bolatyn. Búginde nesibesin jer anadan jıǵan dıqandar ashyq alqaptan jylyna 2 nemese 3 ret ónim alýdy josparlap otyr.
